Nga Blendi Gashi
Shtetasi i Shqipërisë, Agim Madani, i cili të shtunën mbrëma plagosi në fshatin Radavc të Pejës pjesëtarin e policisë Arben Daci, ende nuk është kapur nga policia.
Ai dyshohet se është duke u fshehur në fshatin Jabllanicë të Pejës.
Burime të portalit “Te Sheshi”, bëjnë të ditur se policia edhe sot ka zhvilluar aksion për kapjen e Madanit por pa sukses, pasi nuk ka arritur ta kapë.
Një burim i portalit “Te Sheshi”, brenda Policisë së Kosovës ka treguar në hollësi ngjarjen se si është plagosur polici Daci.
Ky burim ka thënë se patrulla e policisë, pjesë e së cilës ishte edhe polici Daci, të shtunën mbrëma kishte për detyrë të patrullonte në fshatrat Radavc dhe Novosellë pasi në këto dy fshatra kohëve të fundit kishin ndodhur shumë vjedhje.
“Policia kishte marrë një informatë nga qytetarët se tre persona janë duke tentuar me vjedh në fshatin Jabllanicë të Pejës. Policia menjëherë është nisur në drejtim të këtij fshati dhe afër rrugës ka parë dy persona të cilët janë munduar t’i kalojnë telat, dhe në këtë moment policia është ndal, dhe ka dhënë urdhër edhe personave të ndalen pra, Agim Madanit dhe djalit të tij 14-vjeçar të cilët janë shtetas të Shqipërisë, më duket nga Tropoja. Agimi ia ka dalur të kapërcej telat në atë pjesë të fshatit por jo edhe djali i tij, i cili më pas është arrestuar”, tregon burimi ynë.
Burimi ynë më tej tregon edhe ngjarjen se si është plagosur polici Daci, nga shtetasi i Shqipërisë i cili thuhet se është një person tejet i rrezikshëm.
“Polici Daci, sipas asaj që jam në dijeni e ka ndjekur disa metra shtetasin nga Shqipëria të cilin i ka dhënë urdhër që të ndalet, por ky i fundit nuk e ka respektuar urdhërin e policisë. Por, polici ka vazhduar ta ndjekë personin dhe ai në një pjesë nuk ka mundur të kapërcej disa tela. Kur janë afruar afër diku4-5 metra me njëri-tjetrin, polici ka dashur ta fusë në kallëf armën e tij dhe ta arrestojë me dorë Madanin pasi ka menduar që ai nuk është i armatosur. Por, kur janë afruar në këtë distancë, Madani ka filluar të gjuajë me armë, dhe këtu ka mbetur i plagosur polici Daci në shpinë dhe këmbë, por që më pas edhe polici ka shkrepur diku 11 plumba. Policit Daci pasi është plagosur në ndihmë i ka dalë kolegu i tij i cili poashtu ka gjuajtur disa fishekë në drejtim të Madanit dhe në këtë moment e ka lëshuar djalin 14-vjeçar të arrestuar pak minuta më parë. Më pas ka ardhur patrulla e planit operativ që iu ka dalë në ndihmë. Mirëpo, personi i rrezikshëm nga Shqipëria ia ka dalë të ikë. Dyshohte se ai është larguar në drejtim të fshatit Peklen të Pejës, por nuk dihet saktësisht nëse ka ikur në atë drejtim”, thotë burimi ynë.
“Ky person çdo herë që ka pasur konfrontim me policinë çdo herë e ka ndërruar lokacionin, dhe ka një strategji shumë të madhe. Ky person ka qenë edhe me grua edhe me djalë. Sipas fjalëve jo zyrtare ky person i rrezikshëm ka qenë në njësinë ‘Brisku’, të Enver Hoxhës dhe ka qenë një ndër policët më të fortë në atë kohë. Ky person është shumë i stërvitur për mbijetesë, fle në borë, në temperaturë të ftohtë deri në minus 20 gradë. Ky person një me një, për arenë të luftës është shumë i përgatitur”, kanë bërë të ditur burime brenda policisë së Kosovës.
Mënyra si është duke këkruar policia është vështirë të kapet sepse është person shumë i papërshtatshëm”, ka treguar burimi i portalit “Te Sheshi”.
Edhe disa qytetarë të Pejës të cilët nuk kanë dashur të prononcohen me emër kanë deklaruar për portalin tonë në kushte anonimiteti se kanë dëgjuar shumë fjalë në qytetin e tyre se Agim Madani është një person tejet i rrezikshëm që është bërë një ankth i vërtetë për shumë banorë të fshatrave të kësaj komune, pas kryerjes së disa vjedhjeve. Ata shpresojnë që sa më parë Policia e Kosovës ta arrestojë këtë person nga Tropoja e Shqipërisë pasi ai është një person me precedent penalë dhe mund të rrezikojë jetën e qytetarëve të Pejës.
Portali ynë mëson se për kapjen e shtetasit të Shqipërisë, Agim Madani, policia ka bërë disa plane operative ekstra si në fshatarat Bellopojës, Raushiqit etj, në të cilat lokacione dyshohet se ka kryer shumë vjedhje.
Agim Madani shtetas i Republikës së Shqipërisë nga Tropoja, është shpallur nga Policia e Kosovës person në kërkim pasi më 17 korrik 2015, kishte sulmuar patrullën policore në fshatin Gorozhdec të Pejës.
Autoritetet kosovare të rendit, perms një kumtese në muajin korrik kishin kërkuar nga qytetarët bashkëpunim dhe nëse kanë informata që i ndihmojnë ata që të zbulojnë vendqëndrimin e Agim Madanit.
Ndryshe, Madani është ndër katër personat më të këkruar edhe në Shqipëri pasi kreu një vrasje në Tropojë. /tesheshi.com/
