Presidenti francez Emmanuel Macron do të vizitojë Serbinë më 29 dhe 30 gusht, njoftoi të enjten Pallati Elysée, duke shtuar se kjo është një vizitë me qëllim të veçantë “ripohimin e mbështetjes franceze për rrugën evropiane” të këtij vendi ballkanik, transmeton AFP.
Pas vizitës zyrtare të presidentit serb Aleksandar Vuçiç në Paris në prill të këtij viti, udhëtimi i Macron në Beograd do të jetë një mundësi e re për të dy liderët për të diskutuar mbi ekonominë, kujdesin shëndetësor, energjinë, kulturën dhe inteligjencën artificiale, sipas një burimi nga agjensitë franceze.
Kur mirëpriti Vuçiçin në Francë këtë pranverë, Macron theksoi se e ardhmja e Serbisë është “brenda Bashkimit Evropian” dhe “askund tjetër”. Me të njëjtin rast, ai i bëri thirrje Kosovës dhe Serbisë që të “përmbushin obligimet e tyre” dhe të “shkojnë më tutje” në rrugën e normalizimit të marrëdhënieve.
Perspektiva evropiane e Kosovës dhe Serbisë
Në fillim të gushtit, Parisi zyrtar dënoi “shumëzimin e lëvizjeve të njëanshme të autoriteteve të Kosovës” të cilat, sipas politikës franceze, “rrezikojnë përpjekjet për normalizim” ndërmjet Serbisë dhe Kosovës, të cilat janë “parakushte për realizimin e perspektivës evropiane të dy shteteve”, kujton. AFP.
Që nga përfundimi i luftës, dhe veçanërisht pas shpalljes së pavarësisë së Kosovës në vitin 2008, të cilën Serbia nuk e ka njohur kurrë, ndryshe nga shumë vende të tjera perëndimore, të gjitha përpjekjet për marrëveshje dhe dialog kanë dështuar, sipas diplomacisë franceze.
