Aleanca për Ardhmërinë e Kosovës i ka adresuar sot një letër Presidentes së Republikës së Kosovës, Atifete Jahjaga dhe udhëheqësve të tjerë të vendit.
“Aleanca për Ardhmërinë e Kosovës (AAK), përmes kësaj letre, ju drejtohet me kërkesën për reagimin urgjent institucional të Kosovës, në lidhje me rastin e z. Ramush Haradinaj, i cili është ndaluar në Slloveni gjatë ditës së djeshme”, thuhet mes tjerash në letër.
Kjo bëhet e ditur pak kohë pasi Kuvendi i Kosovës miratoi rezolutën trepikëshe për veprimet që do të ndërmerren rreth rastit të ndalimit të Ramush Haradinajt në Slloveni, me 65 vota pro, 8 abstenime e asnjë kundër.
Aleanca për Ardhmërinë e Kosovës ka bërë të ditur në një konferencë shtypi se nga sot në mesditë “vazhdon protestën pranë Ambasadës së Sllovenisë në Kosovë, për të shprehur mospajtimin dhe indinjatën ndaj sjelljes së autoriteteve sllovene me ish-kryeministrin e Kosovës dhe kreun e Aleancës, Ramush Haradinaj”.
AAK ka ftuar qytetarët nga mbarë vendi që të bashkohen në protestë, deri në lirimin përfundimar të Haradinajt.
