Nga Blendi Gashi
Pas mocionit të mosbesimit të paralajmëruar që nuk u realizua, LDK-ja e Isa Mustafës ka paralajmëruar bojkot të Kuvendit, gjë që e ka bërë një nga seancat e kaluara.
Kërcënimi erdhi nga kryetari i grupit parlamentar, Avdullah Hoti, i cili la të nënkuptohet se përmes rrugës së bojkotit e shohin të vetmen mënyrë se si ta rrëzojnë qeverinë “Haradinaj”.
“Ne do të vazhdojmë dhe do ta thellojmë bojkotin e këtij Kuvendi deri sa vendi të shkojë në zgjedhje”, tha Hoti në seancën e së enjtes.
Për të parë nëse skenari i tyre mund të realizohet, LDK duhet të pres sesionin vjeshtor, pra fundit e muajit shtator dhe fillim tetorin, pasi kryeparlamentari Kadri Veseli ka paralajmëruar se Kuvendi mund të shkojë shumë shpejt në pushimin veror.
Por sa mund të jetë efektiv bojkoti i LDK-së?
Analistët shprehen skeptikë se LDK-ja me bojkot të punimeve të institucionet ligjvënës mund ta rrëzojë nga pushteti Ramushin.
Analisti politik, Shemsi Jashari, “kërcënimin” e LDK-së e sheh si veprim për konsum të brendëshëm politik pa një qëllim të vërtetë ta rrëzojë qeverinë.
Sipas tij, disa herë LDK ka demantuar vetën ne nismat që i ka paralajmëruar vetë, andaj bojkotin eventual e sheh më shumë si kundërpërgjigje ndaj thirrjes së Partisë Socialdemokrate që të arrihet marrëveshje mes opozitës për të provuar rrëzimin e qeverisë përmes mocionit te mosbesimit.
“LDK asgjë nuk mund të përfitoj nga fillimi i bojkotit pasi si zakonisht tërhiqet nga një presion i lehtë qoftë vendor apo ndërkombëtarë. Në këtë fazë LDK nuk është e interesuar për zgjedhje pa u përfunduar çështja e dialogut Kosovë-Serbi, pasi tradicionalisht punët e mëdha shtetformuese janë kryer pa LDK-në si drejtuese, por vetëm si përcjellëse. Thjeshtë thënë LDK nuk e ka seriozisht rrëzimin e qeverisë Haradinaj. Bojkoti më shumë është për të nxitur elektoratin e LDK-së të besoj se kinse po bëjnë diçka”, thotë Jashari për tesheshi.com.
Edhe politologu, Gurakuç Kuçi, nuk e serioze paralajmërimin e LDK-së për bojkot, duke thënë se kjo parti më shumë e bën për të qenë në qendër të vëmendjes se në të vërtetë dëshiron zgjedhjet e reja.
“Veprimet e LDK-se janë normale nga pozicioni i saj opozitar, por janë komplet në kundërshtim nga veprimet e saj nga koha kur ishte në qeverisje. Nuk janë aspak serioze. LDK-ja tani nuk dëshiron zgjedhje ashtu siç deklaron, por janë reklamacione për faktorizimin e saj në publik dhe të shfrytëzojë dobësitë e pozitës për poena politik. Refuzimi i pjesëmarrjes në Kuvend do ishte nëse do kishin guximin ta bënin mbi gjashte muaj, ndryshe janë në pozicionin e njëjtë me veprimet e Listës Serbe e cila refuzonte Kuvendin por kthehej pa u bërë gjashtë muaj”, thotë Kuçi për tesheshi.com.
Ai më tej shton se kompozicionet e tilla opozitare janë shaka sepse nuk po janë të zotët ta rrëzojnë qeverinë e as nuk duan të shkojnë në zgjedhje e të marrin përgjegjësi mbi disa procese te cilat edhe tani i refuzojnë pa ofruar alternativë të qarte.
“Pra pragmatizmi opozitar është i padenjë me deklarimet dhe qëndrimet e tyre momentale, gjegjësisht e LDK-së”, shprehet Kuçi. /tesheshi.com/
