Putini nuk po ndalet dhe ne perëndimorët tani jemi në luftë, kështu që qeveritë evropiane duhet ta paraqesin qartë këtë para qytetarëve të tyre dhe publikut, shkruajnë kështu disa media evropiane.
Evropa ka “hyrë në luftë” me Rusinë përmes Ukrainës dhe nuk është e qartë se cilat janë qëllimet ushtarake dhe politike të kësaj ndërhyrjeje, ndërkohë që agresioni në rritje i Rusisë dhe vendosmëria e presidentit amerikan Joe Biden për të ofruar mbështetje të madhe financiare dhe për të dërguar armë në Kiev, po shtyjnë Evropën që të bëhet skena e një konflikti mes dy superfuqive bërthamore.
Kështu mendojnë komentues mediatikë në BE. Mes tyre, drejtori i gazetës italiane La Stampa, Massimo Giannini, i cili thotë: “Putini nuk po ndalet dhe ne perëndimorët tani jemi në luftë, kështu që qeveritë evropiane duhet ta paraqesin qartë këtë te qytetarët e tyre dhe publiku.”
Një pyetje të ngjashme shtron edhe e përditshmja franceze Le Monde, e cila thekson se Uashingtoni tashmë e ka “marrë përsipër” plotësisht luftën në Ukrainë, sepse vendimet e fundit për dhjetëra miliarda dollarë financim armatimi të teknologjisë së fundit, janë një tregues i qartë i synimeve të SHBA.
E përditshmja spanjolle El Pais thekson shqetësimin se Evropa është “pa vullnetin e saj dhe qëllimisht” e tërhequr në “luftën e fuqive të mëdha mbi Ukrainën”.
Mediat e BE-së raportojnë se burimet e NATO-s do të intensifikojnë dhe zgjasin luftën në Ukrainë, sepse ushtria ruse nuk ka asnjë perspektivë ta kthejë luftën në favor të saj, kështu që nuk ka asnjë perspektivë për krijimin e kushteve për ndërprerjen e konfliktit dhe negociata më serioze me Moskën.
“Fundi i paqes”
E përjavshmja gjeopolitike italiane Limes konkludon se Evropa tani është “fundi i paqes” dhe thekson se “kontinenti i vjetër është skena e një konflikti të vështirë dhe një dëshmitar okular i faktit se periudha e gjatë e paqes po zhduket qartë”.
Komentuesit pyesin gjithashtu se çfarë do të thotë vendosmëria e Uashingtonit për të “përmbysur fuqinë e Rusisë” përmes luftës në Ukrainë dhe thonë se disa struktura qeverisëse në Bashkimin Evropian duket se i janë bashkuar kësaj pikëpamjeje, teksa presidentja e Komisionit Evropian Ursula von der Layen dëshiron që BE të hyjë në luftë në Ukrainë, sepse “agresioni rus është një kërcënim i drejtpërdrejtë për sigurinë tonë, kështu që ne duhet të bëjmë gjithçka për ta bërë atë një humbje strategjike (të Rusisë)”.
Nga kjo varet edhe e ardhmja e rendit ndërkombëtar dhe mbijetesa e ekonomisë botërore, tha ajo gjatë vizitës së saj në Indi.
“Askush nuk flet për një fitore të shpejtë”
Deutsche Welle vëren se “askush nuk po flet për një fitore të shpejtë në konfliktin me Rusinë, për më tepër – NATO po flet për një luftë që mund të zgjasë me vite”.
“Moskës nuk i duhet lejuar kurrë të jetë aq e fortë sa është tani, në gjendje të bëjë luftëra kundër vendeve të tjera”, siç tha Uashingtoni.“Rusia duhet të detyrohet të paguajë për rindërtimin e Ukrainës pas luftës, të tërheqë trupat nga Gjeorgjia dhe Moldavia dhe të largohet nga Bjellorusia”, tha Deutsche Welle.
“Perëndimi ekonomikisht superior”, kujton kjo media gjermane, “përdori garën e armëve në vitet 1980 për ta shtyrë Rusinë drejt falimentimit” dhe beson se “historia po përsëritet tani”, por “Rusia është më e dobët se BRSS e atëhershme dhe Perëndimi është më i madh, më i bashkuar dhe më i fuqishëm se kurrë”. /tesheshi.com/
