Nga Mark Brunga
Në mediat televizive të vendit tonë(Ora News) është emetuar nje lajm televiziv mbi vërejtjet e bëra nga një çift italian mbi betonizimin e Sarandës dhe të Ksamilit. Bashkëshortët nga vendi fqinj kishin 53 vite martesë dhe kishin shëtitur së bashku si turistë duke eksploruar rreth 60 vende të ndryshme në botë.
Këtë vit ata kanë ardhur dhe janë zhgënjyer nga çfarë u kishin rekomanduar miqtë e tyre, se në jug të Shqipërisë gjenden plazhet më të bukura në botë. Çifti italian është shprehur se: “Ishte parashikuar që të qëndronim në Ksamil por ia mbathëm që aty. Erdhëm për detin, plazhet e jugut të Shqipërisë, por u larguam nga Saranda apo edhe nga Ksamili pasi kishte shumë njerëz, shumë rrëmujë dhe shumë ndërtesa të panevojshme.”
Më tej një nga bashkëshortët italianë është shprehur se: “Nga Shqipëria më pëlqyen shumë qytetet historike, si Gjirokastra apo Berati, Butrinti apo Apolonia. Por nëse flasim për plazhin ai nuk ekziston më, ka beton që shkon deri në breg të detit, ka shumë çimento këtu. Saranda e Ksamili më kanë zhgënjyer shumë. Nuk e prisja një shkatërrim të tillë.”
Por a kanë të drejtë italianët në fjalë? Sigurisht që deri diku po. Themi deri diku, pasi sido që të jetë plazhet shqiptare jo të gjithë janë cënuar nga ndërtimet e shumta. Sidomos në jug, ku si shkak i terrenit të thyer, por dhe i kthjelltësisë së Jonit, kanë me bollëk plazhe unikale që të mahnisin. Qoftë dhe në Ksamil. Italianët kanë të drejtë vetëm sa i përket terrenit urban afër plazheve, që pa dyshim ka një degradim për shkak të ndërtimeve pa kriter.
Fakt është ama se të huajt sa vijnë e shtohen plazheve tona, aq më tepër në ato të jugut, përfshi sidomos Ksamilin; edhe pse janë bërë jo pak dëme. Ndërkohë që miqtë që ia kishin referuar çiftit Italian bregdetin dhe plazhet shqiptare të jugut, nuk besohet të kenë qenë dhe aq budallenj.
Fjala vjen Saranda. Duke i`u referuar disa fotove të bëra në vite të ndryshme gjithsecili mund të dalë më konkluzione se çfarë ka humbur dhe çfarë ka fituar ky qytet nga betoni që i është derdhur për më shumë se një dekadë, që ngjan me një llavë përcëlluese që ia ka përtharë hijeshinë e dikurshme.
Fotot e vjetra, (2 copë), i përkasin Sarandës së viteve 1980, (dhe një foto krahasuese me Sarandën e sotme), kohë kur ndërtesat ishin me kate të ulëta dhe gjelbërimi sundonte peisazhin e këtij qyteti. /tesheshi.com/
