Lufta në Ukrainë e ka sjellë njerëzimin në pikën më të rrezikshme të historisë së tij, thotë Noam Chomsky, i cili madje i frikësohet mundësisë së një lufte të plotë bërthamore.
Mendimtari foli me New Statesman, duke denoncuar “agresionin kriminal” të presidentit rus Vladimir Putin, i cili po rezulton të jetë “monstruoz për Ukrainën”.
Noam Chomsky, tani 93 vjeç, ka lidhje personale me Ukrainën. Babai i tij lindi atje dhe emigroi në Shtetet e Bashkuara në 1913 për të shmangur regjistrimin në ushtrinë cariste. Nëna e tij ka lindur në Bjellorusi.
“Po i afrohemi pikës më të rrezikshme në historinë njerëzore. Tani po përballemi me perspektivën e shkatërrimit të jetës së organizuar në Tokë”, tha ai për revistën britanike, duke iu referuar luftës bërthamore dhe krizës klimatike.
Lidhur me agresionin e Putinit, Chomsky shpjegoi se ka dy mënyra të mundshme për ta parë këtë:
“Një është mënyra, e cila është në modë në Perëndim, për t’u përpjekur të futemi në mendjen e çoroditur të Putinit dhe të përcaktojmë se çfarë po ndodh thellë në shpirtin e tij. Mënyra tjetër është të shohësh faktet. Në shtator 2021, Shtetet e Bashkuara lëshuan një deklaratë të fortë mbi politikën e tyre, duke bërë thirrje për bashkëpunim të zgjeruar ushtarak me Ukrainën, vendosje të mëtejshme të armëve të avancuara ushtarake, të gjitha pjesë e programit të forcimit të NATO-s dhe pranimin e Ukrainës.
Ajo që dimë është se Ukraina do të shkatërrohet edhe më shumë. Dhe ne mund të shkojmë në një luftë bërthamore që do të sjellë shkatërrim total nëse nuk ndjekim mundësitë që ekzistojnë për një zgjidhje të negociuar.”
Noam Chomsky shton se frika më e madhe e Putinit nuk është rrethimi i Rusisë nga NATO, por përhapja e demokracive liberale në Ukrainë dhe vendet fqinje. Sigurisht, vazhdon Chomsky, performanca e SHBA nuk është shumë pozitive. Uashingtoni ka një histori të pasluftës të minimit dhe shkatërrimit të demokracisë.
Chomsky kujtoi gjithashtu se Shtetet e Bashkuara i kishin premtuar (përmes sekretarit të atëhershëm të shtetit James Baker) Mikhail Gorbachev-it se nuk do të zgjeroheshin drejt Lindjes. Një premtim që nuk u mbajt, siç thotë ai.
Megjithatë, ai tha: “Është e drejtë të kemi zemërim moral mbi veprimet e Putinit në Ukrainë. Por do të ishte edhe më e arsyeshme të kishim zemërim moral ndaj mizorive të tjera të tmerrshme.”
Ai përmend Afganistanin si shembull, “ku fjalë për fjalë miliona njerëz po përballen me urinë e afërt”.
“Pse ka ushqim në treg, por njerëzit që kanë pak para duhet t’i shohin fëmijët e tyre të uritur sepse nuk mund të shkojnë në treg për të blerë ushqim? Në këtë rast, përgjegjësia e SHBA-së është e madhe”, thotë ai. /tesheshi.com/
