Nga Blendi Gashi
U bë më shumë se një muaj që në Kosovë ka filluar viti i ri akademik, 2015-2016. Shumica e studentëve që vijnë nga rajone të ndryshme të Kosovës thonë se nuk punojnë e se mjetet financiare për studime i sigurojnë nga familjet e tyre. Dhe për këtë arsye, studimet u duken me shumë kosto.
Për portalin tesheshi.com, disa studentë të anketuar thonë se me vështirësi po arrijnë të përfundojnë studimet
Përparim Gagjiqi, nga komuna e Klinës: “Qe tre vite banoj në Prishtinë me shokë. Kemi marrë një banesë në vlerë 300 euro. Na bie të paguajmë diç më shumë se 50 euro për person veç për banim, pastaj paguajmë rrymën, ujin dhe bërllogun. Kur i shtohen harxhimet e ushqimit, udhëtimi, shpenzimet për literaturë, më shkojnë më shumë se 200 euro në muaj. Familja më financon pasi nuk punoj. Është një krizë e madhe pasi të gjitha gjërat janë shtrenjtuar. Përkundër të gjithave, jeta studentore në kryeqytet është e bukur dhe e hareshme”, ka deklaruar Gagjiqi për portalin tonë.
Dreni Gashi, student i Fakultetit Ekonomik: “Punojnë prindërit dhe më financojnë. Ata më dërgojnë para që ta paguaj semestrin, rrugën dhe shpenzimet tjera për literaturë. Është papunësi e madhe, sidomos ne studentët po hasim në vështirësi pasi nuk po ka punë.”
Endrit Deliu, nga komuna e Skënderajt: “Në familjen time punon vetëm babi. Ai nga rroga që merr më jep një pjesë për studimet e mija. Nuk do t’ia harroj kurrë mundin që e bën për mua. Jam duke shikuar mundësinë që të punoi në mënyrë që t’ia lehtësoi prindit në mënyrë që t’i heq shpenzimet e mija, por pse jo t’i ndihmojë sadopak edhe familjes.”
Në Fakultetin Juridik studion edhe Endrit Krasniqi, nga komuna e Ferizajt. Ai thotë se për t’i ndjekur ligjëratat udhëton dy herë në javë drejt Prishtinës. Duke e konsideruar të shtrenjtë jetën studentore, ai tregon edhe mënyrën e financimit.
“Varemi nga familja, unë gëzoj bursë nga universiteti, gjatë sezonit të verës, bëj punë sezonale në vendet perëndimore. Unë udhëtoj dy herë në javë, është më lirë se sa të banojmë në Prishtinë. Por përgjithësisht jeta është e shtrenjtë”, shprehet Endriti.
Kolegu i Endritit, Fisnik Kryeziu, i cili banon në Prishtinë poashtu thotë se 50 euro në muaj paguan për rrymë, pa shërbimet komunale.
Për dallim nga studentët tjerë, ai thotë se derisa t’i përfundon studimet nuk është i interesuar të punoj.
“Studentët janë e ardhmja e vendit por ata janë lënë anash, nuk kanë përkrahje nga shteti. Unë jam i përqëndruar vetëm në studime dhe nuk dua të punoj pasi nëse do të hyja në punë studimet do t’i lëja anash”, tregon Fisniku.
Egzona Balaj nga Komuna e Klinës udhëton çdo ditë për t’i përcjellë ligjëratat. Thotë se shpenzimet për një student janë shumë të larta.
“Unë për dallim nga studentët e tjerë udhëtoj pothuajse çdo ditë. Rruga më kushton 4 euro në ditë. Për bukë harxhoj deri në 2 euro, kurse librat kushtojnë shtrenjtë, por ne i fotokopjojmë me nga 2- 3 euro. Poashtu, bëj shpenzime edhe për kafe”, thotë ajo.
Ndërkaq studentët e rregullt në Universitetin e Prishtinës, paguajnë 25 euro për semestër, ndërkaq ata me korrespondencë paguajnë 125 euro. /tesheshi.com/
