Nga Blendi Gashi
Mbajtja e zgjedhjeve të reja shihet si një nga mundësitë për të dalë nga kriza politike që ka kapluar Kosovën nga muaji shtator i vitit të kaluar.
Pikërisht më 17 shkurt, Ditën e Pavarësisë, VV, AAK, NISMA, do të mbajnë sërish protestë në Prishtinë me kërkesë dorëheqjen e qeverisë së udhëhequr nga Isa Mustafa.
Por, dy partitë në pushtet PDK-LDK kategorikisht mohojnë mbajtjen e zgjedhjeve në një kohë të afërt, duke thënë se 2018-ta është viti kur do të mbahen ato.
Ambasadorja gjermane në Kosovë, Angelika Viets, është pozicionuar në anën e partive të koalicionit pasi ka shprehur haptas qëndrimin e saj kundër zgjedhjeve të reja.
Ajo ka theksuar se edhe nëse ato do të mbaheshin, Kuvendi i ri do të dukej gati i njëjtë me aktualin.
“Sipas sondazheve, përbërja e re e Kuvendit, nuk do të ndryshonte shumë nga ajo që është tani”, ka thënë ambasadorja Viets.
Për dallim nga ambasadorja gjermane, njohësit e rrethanave politike në vend dhe ish-deputetë, thonë se kurdo që trokasin zgjedhjet e reja, gjasat janë të mëdha që të ndryshojë struktura në Parlament.
Ata thonë se partitë politike duhet që t’i ofrojnë elektoratit njerëz me kredibilitet dhe të denjë për të përfaqësuar interesat e popullit, e jo njerëz që kanë probleme me ligjin.
Opinionisti Dardan Velija beson se ndryshimi do të jetë i dukshëm në pejsazhin politik në vend pas zgjedhjeve, kurdo që të mbahen ato.
Ai vlerëson se gjasat janë të mëdha që të ndryshojë sturktura në Parlament dhe shton se vështirë që disa ligjvënës aktualë të mund të sigurojnë ulësen e deputetit në mandatin e ardhshëm.
“Nuk është e lehtë të parashikohet struktura e Kuvendit të ri, por shkaktar i krizës është mungesa e legjitimitetit të koalicionit dhe jo rezultati zgjedhor. Është e mundshme që të ndryshohet përbërja e Kuvendit, por nuk është lehtë e parashikueshme cila do të jetë struktura e listave zgjedhore të partive”, ka thënë Velija, për tesheshi.com.
Ish-deputeti Naser Rugova, mendon se zgjedhjet e reja kurdo që mbahen do të sjellin ndryshime në tempullin e demokracisë.
“Vlerësoj se kjo përbërje aktuale e Kuvendit vetëm është dëshmuar si përbërja më e papërgjegjshme nga të pesë legjislaturat. Edhe subjektet politike do të mendoheshin mirë për emrat që do t’i kandidonin në listat zgjedhore pas ngjarjeve të fundit, ku vërtetë besimi në njerëzit e zgjedhur është luhatur dukshëm”, ka deklaruar Rugova për tesheshi.com.
Analisti politik, Albinot Maloku, thotë për tesheshi.com se zgjedhjet e reja me klasën aktuale dhe subjektet politike që veprojnë për momentin, nuk do të ndryshonin diçka nga përbërja aktuale e Kuvendit, por do të mbyllnin nevojën e matjes së forcave dhe koalicioneve të mundshme të reja që mund të ndodhnin para ose pas zgjedhjeve.
“Kërkuesit e zgjedhjeve janë të obliguara të ofrojnë emrat të cilët nuk janë të inkriminuar dhe të cilët ndiqen nga ligji. Një subjekt të ri politik me emra që nuk kanë qenë pjesë e asnjërës nga garniturat politike është mëse e mirëseradhurpër hyrjen e këtij subjekti politik në Kuvend”, thotë Maloku. /tesheshi.com/
