Prokurorët italianë kanë kërkuar një dënim me gjashtë vjet burg për zëvendëskryeministrin italian Matteo Salvini, pasi gjatë kohës sa ishte ministër i Brendshëm, ka penguar zbarkimin e emigrantëve në një port italian në vitin 2019.
“Prokurorët kërkuan që ish-ministri i Brendshëm Salvini të dënohet me gjashtë vjet burg”, tha avokati i organizatës “Open Arms” Arturo Salerni pas seancës të së shtunës.
Vendimi në gjyqin kundër Salvinit, i cili filloi në tetor 2021, mund të shpallet muajin e ardhshëm, raporton sot gazeta franceze Figaro.
Salvini nuk mori pjesë në seancën dëgjimore dhe më parë shkroi në rrjetin X se “do të bënte sërish të njëjtën gjë, sepse mbrojtja e kufijve kundër emigrantëve të paligjshëm nuk është krim”. “Është e pabesueshme që një ministër rrezikon gjashtë vite burg, sepse ai po bënte detyrën e tij duke mbrojtur kufijtë”, shtoi ai.
Prokurori Gary Ferrara tha në argumentet përmbyllëse në një gjykatë në Palermo, Siçili se ekzistonte “një parim kyç i padiskutueshëm”. “Midis të drejtave të njeriut dhe mbrojtjes së sovranitetit shtetëror, janë të drejtat e njeriut ato që duhet të mbizotërojnë në një sistem demokratik”, përfundoi ai.
Salvini, lideri i Ligës së ekstremit të djathtë dhe partneri i koalicionit të kryeministres Giorgia Meloni, është në gjyq për privim të dyshuar të lirisë dhe shpërdorim detyre, sepse ai nuk lejoi 147 emigrantë të zbrisnin nga anija Open Arms për javë të tëra. Salvini ishte ministër i Brendshëm në atë kohë.
Anija u ankorua në det për gati tre javë përpara se emigrantët të lejoheshin të zbrisnin në ishullin Lampedusa bazuar në një urdhër gjykate.
Anëtarët e Open Arms thanë se gjendja fizike dhe psikologjike e migrantëve kishte arritur një pikë kritike pasi kushtet sanitare në bord ishin bërë të rënda, duke përfshirë një shpërthim zgjebe.
Në vitin 2019, Salvini zbatoi një politikë “portesh të mbyllura” ku Italia ndaloi hyrjen e anijeve të ndihmës që shpëtonin emigrantët e bllokuar që kalonin Detin Mesdhe.
Salvini u përball me një gjyq të ngjashëm për moslejimin e 116 emigrantëve që të zbrisnin nga një anije e rojes bregdetare italiane në vitin 2019, por një gjykatë në Catania hodhi poshtë këto akuza në vitin 2021. /tesheshi.com/
