Kryeqyteti italian, Roma, po përgatitet të festojë këtë fundjavë 60 vjetorin e nënshkrimit të traktateve të Romës, të cilat vunë bazat e themelimit të Bashkimit Europian. Ndërsa pritet që në qytet të mbërrijnë krerët më të lartë të 27 vendeve të bllokut dhe ato të Brukselit, policia ka rritur masat e sigurisë. Roma duket se super-blinduar për shkak të druajtjes nga terrorizmi si dhe manifestimeve të anti-europeistëve.
Rreth 8 mijë trupa të policisë e ushtrisë do të mbikqyrin rrugët, ndërsa qendra historike e Romës, vendndodhjet e monumentet arkeologjike do të qëndrojnë të mbyllura për motive sigurie.
Gjithashtu do të ndalohet ushtrimi i aktivitetit tregtar i shitësve ambulantë dhe do të mbyllen dyqanet, stacionet e metropolitanës si dhe shkollat përreth qëndrës historike.
Gjatë ditës së shtunë, pritet të mbërrijnë në Romë nga e gjithë Europa, aktivistë të lëvizjes anti-europeiste si dhe të lëvizjes black-block. Ndërkohë, organizatat humanitare pro emigrantëve nën slloganin #NotMyEurope do të manifestojnë kundër politikave jo efikase europiane që vazhdojnë të shkaktojnë viktima në Mesdhe e të lënë të pazgjidhur krizën e emigrantëve.
Me rastin e 60-vjetorit të traktateve të Romës, 27 vendet anëtare pritet të nënshkruajnë të shtunën në selinë e bashkisë së këtij qytetit Deklaratën e re të Romës. /tesheshi.com/
