Ministri Arsim Bajrami ka urdhëruar Inspektoratin e Arsimit që të nisë inspektimin special pas dyshimeve të ngritura për lëshimin e diplomave false nga Fakulteti i Shkencave të Aplikuara të Biznesit në Pejë mes viteve 1999-2004.
Në vendimin të ministrit Bajrami të datës 9 mars 2015, të cilin ka arritur ta sigurojë gazeta “Zëri”, thuhet se urdhërohet Inspektorati i Arsimit që të ndërmarrë të gjitha veprimet e nevojshme për inspektim special të dyshimeve të ngritura për falsifikim masiv tëdiplomave, ku dyshohet se janë lëshuar 503 diploma false.
Sipas dosjes së Prokurorisë, mësohet se zyrtarë të lartë të Agjencisë Kosovare të Inteligjencës (AKI), profesorë universitarë, menaxherë të lartë të kompanive publike e private, kanë marrë diploma të këtij Fakulteti, ndonëse nuk ka qenë të regjistruar si studentë e as që kanë ndjekur ligjëratat ndonjëherë.
Fakulteti i Shkencave të Aplikuara të Biznesit më herët ka funksionuar në kuadër të Universitetit të Prishtinës, ndërsa pak vite më parë është pavarësuar dhe ka marrë emrin Universiteti “Haxhi Zeka” – Pejë. /tesheshi.com/
