Në një takim me veteranë të luftës në kuadër të 5 Majit, Ditës së Dëshmorëve, kryeministri Rama e deklaroi hapur se nderimin për Mit’hat Frashërin, ish një prej krëreve të Ballit Kombëtar, por njëherësh dhe një mendimtar dhe intelektual i shquar, do e bënte sërish.
“Unë do ta bëja prap edhe njëherë njësoj ceremoninë për Mid’hat Frashërin që të jemi të qartë. Unë nuk i besoj historisë së shkruar nga fitimtarët por domsdoshmërisë që ne ta kapërcejmë atë histori duke mos rënë kurrë në grackë si dhe duke mos lejuar atë që u tha këtu që në emër të studimeve të krimit të komunizimit t’i cënohet një fije floku cilitdo që mori armën për të luftuar nazimin. Çfarë ndodhi dhe si ndodhi në pikëpamje të luftës për çlirim deri në 29 nëntor 1944 nuk mund të jetë kurrë objekt i një instituti që paguhet nga taksat. Çfarë erdhi pas i takon atij instituti. Besoj që nuk ka nevojë të zgjatem në pse-në e të gjitha arsyejeve që i kam dhënë lidhur me atë ceremoni, por më lejoni t’u them nuk e vlerësojmë si duhet luftën antifashiste, nuk e vlerësojmë si duhet gjakun e dëshmorëve nëse i hyjmë në hak kujtdo që ka qenë në një pozicion ndryshe dhe ka dëshiruar çlirimin e vendit. Të vërtetat janë pak më komplekse kur vjen puna për figura të caktuara dhe është mirë që sot t’i ndajmë që të mos ua lëmë edhe brezave të rinj asgjë nga e keqja që komunizmi futi në historinë e shkruar nga fitimtarët”, u shpreh kryeministri.
Nga ana tjetër, ai nderoi luftën për çlirim dhe tha se ajo nuk duhet ngatërruar me çfarë ndodhi më pas.
“Nuk duhet të ngatërrojmë atë që buron nga gjaku i luftës antifashiste me atë që buron nga derdhja e një gjaku të pasluftës nga një regjim diktatorial. Ajo që bëri lufta ishte vendosja e shqiptarëve me fituesit. Më vjen shumë mirë që sot jemi të gjithë bashkë për ta rikonfirmuar përkatësinë tonë morale dhe politike ndaj të gjithë atij frymëzimi që na mbajti në anën e duhur të historisë, për të përmbushur amanetin e dëshmorëve”, shtoi i pari i qeverisë. /tesheshi.com/
