Pas sulmeve të fundit në Paris shembuj të shumtë që luftojnë islamofobinë janë dhënë nga njerëz në të gjithë botën, por rasti më i mirë është ai i 7-vjeçarit Jack, i cili dhuroi paratë e mbledhura prej tij në një arkë kursimi për një xhami të sulmuar në Teksas.
Edhe pse persona të shumtë mbështetën xhaminë duke dhuruar para dhe lule, dhurimi i këtij vogëlushi ishte krejtësisht ndryshe.
Nëna e tij, Laura Swanson e solli Jack në Qendrën Islamike të Pflugerville për të dhuruar 20 dollarët që fëmija i vogël i kishte mbledhur në formën e qindarkave. Anëtari i bordit të qendrës, Faisal Naeem u shpreh se ishte tërësisht i mahnitur nga mirësia e fëmijës dhe lloji i veçantë i dhurimit të tij.
“Janë 20 dollarë që vijnë nga Jack, të mbledhura në qindarka, por vlejnë sa 20 milion dollarë për mua dhe për të gjithë komunitetin”,- tha ai.
Jacku i vogël u shpërblye më pas për bujarinë e tij nga Komuniteti Mysliman, të cilët i blenë të voglit një iPad, çka solli buzëqeshjen në fytyrën e fëmijës.
Ndërkaq, forcat e rendit po kërkojnë për identifikimin e përgjegjësit apo përgjegjësve të këtij vandalizmi. Sipas burimeve zyrtare, akti i vandalizmit të kryer në Qendrën Islamike të Pflugerville u klasifikua si krim i urrejtjes.
Fatmirësisht, nga vandalizmi nuk pati dëmtime të mëdha në institucionin e kultit dhe vlera monetare e llogaritur ishte 150 dollarë, çka e bëri dhurimin e Jack me një vlerë të rëndësishme.
Shumë myslimanë nga xhami të ndryshme rreth Austin erdhën në Pflugerville mbrëmjen e së hënës, kur ndodhi kjo ngjarje, për të dhënë mbështetjen e tyre. “Donim të shprehnim mbështetjen tonë dhe të tregonim se jemi këtu për vëllezërit dhe motrat tanë”,- tha një grua myslimane.
“Kjo është një ngjarje e papritur dhe shokuese. Me vandalizmin vjen dhe frika”,- tha Naeem./tesheshi.com/
