Prej disa orësh, disa portale, agjenci e media në Tiranë, kanë tronditur opinionin publik me lajme dhe njoftime të shkurtëra me tituj të tmerrshëm: “Ja ku mund të sulmojë ISIS në Tiranë”, “Vendet ku duhet të shkojmë dhe nuk duhet të shkojmë”, “Tirana, e kërcënuar njësoj si Moska” etj, etj.
Një informacion i rrjedhur nga zyra e shtypit e kreut të shtetit mbi një shkresë të shërbimit sekret shqiptar të marrë nga agjencitë partnere, ka marrë dhenë dhe është transformuar duke hapur panik nëpër Tiranë.
Njerëzit nuk janë ndjerë fare të qetë nëpër Tiranë dhe kudo ndjeje tension, frikë dhe ankth për lëvizjet normale që familjarët bëjnë, e ku tjetër, në qendrat tregtare për të nxjerrë kalamajt.
Por s’ishte e thënë, pasi nga titujt bombardohej info papushim për vendet, orën, kohën dhe sasinë e sulmeve terroriste.
E gjithë kjo zallamahi jo-informacioni është në vetvete një akt i pastër terrorist, pasi kërkon të ndryshojë rutinën e qytetarëve, duke krijuar premisa për devijimin edhe të mendimeve.
Nëse vërtetë ka ardhur ndonjë informacion nga SHISH në Presidencë, prej andej si lidhje e shkurtër në Klan e më pas në mediat e tjera, ai vlen të jepet me kujdes dhe profesionalizëm. Mjafton lajmi që “ka të dhëna të besueshme që Tirana është e kërcënuar nga ISIS dhe për këtë ka shkresa zyrtare të agjencive partnere”, edhe gjithçka kuptohet pa qenë nevoja të hapet panik.
Ka një javë që prej sulmeve të Parisit që mediat shqiptare kanë dhënë debate televizive mjaft të mbrapshta, duke dyzuar opinionin publik se ç’duhet të bëjnë myslimanët në këtë kohë, a duhet të ndryshojnë, si duhet të vishen, si duhet t’i mbajnë flokët, të pijnë edhe birra, madje edhe nga një gotë raki do t’i bënte mirë të largonin trurin, e të tjera broçkulla të tilla, kur nuk ka pasur asnjë analizë mbi historikun dhe gjeopolitikën e lëvizjeve tektonike që kanë ushqyer, rritur dhe nxitur ISIS-in, por dhe gjithë organizatat okulte terroriste.
Ç’punë ka një person që e quan veten vetëm besimtar të komentojë ngjarjet e Francës, kur televizionet botërore kanë thirrur specialistë sigurie, ish-ministra të jashtëm, ish-presidentë apo gjeneralë e admiralë.
Ndërkohë kur vendi është i mbushur me lajme e fenomene, është zgjedhur teoria e informacioneve që frikësojnë njerëzit me shpresë se rrisin audiencën.
Në intervistën për Rudina Xhungën, shkrimtari francez më i shitur, Michel Houellebecq, e tha troç se “ne nuk bëjmë libra për të parashikuar, por për të prekur frikërat e njerëzve. Këtë e kërkojnë vetë ata…”/tesheshi.com/
