Në një mesazh për 4 Korrikun Festën së Pavarësisë së SHBA, që është dhe Festa Kombëtare e fuqisë më të madhe botërore të momentit, ambasadori amerikan në Kosovë Philip Kosnett, përcolli një mesazh që dukej se ishte apostafat për lidershipin e Prishtinës.
“Në vitin 1776, Shtetet e Bashkuara ishin në një udhëtim drejt pavarësisë. Themeluesit tanë nuk kërkuan vetëm lirinë nga një mbret i huaj. Ata u përpoqën ta ndërtojnë një lloj të ri të shoqërisë – një republikë që njohu se jeta, liria dhe kërkimi i lumturisë ishin të drejta të qarta njerëzore”, u shpre ambasadori, duke i kujtuar shoqërisë kosovare që të kuptojë se ç’kishte hequr ap po heq ajo, i ka hequr më parë dhe Amerika e ëndrrave të tyre.
“Amerikanët kanë përjetuar kohë gëzimi e përparimi, por edhe të dhimbjes e regresit. Në vitet 1860, qindra mijëra amerikanë, të bardhë e të zi, vdiqën në një luftë tragjike civile për t’ua sjellë lirinë miliona amerikanëve të tjerë të skllavëruar”, tha njeriu i Uashingtonit në Prishtinë.
Ai i kërkon shoqërisë kosovare që t’a kuptojë kohën dhe kontekstin ku jeton e vepron, duke besuar në të ardhmen.
“Në Amerikë, si në çdo vend, demokracia nuk është sport për spektatorë. Demokracia kërkon angazhim dhe këmbëngulje aktive të qytetarëve. Gjithashtu kërkon ndershmëri dhe këmbëngulje për t’i adresuar dobësitë tona dhe për të mësuar nga dështimet tona.
Kjo është një kohë trazirash dhe ankthi në Amerikë – por gjithashtu edhe kohë shprese. Shpresoj që një ndryshim i pakthyeshëm, pozitiv mund të ndodhë me një popullsi të angazhuar.E njëjta gjë mund të thuhet për Kosovën”, thotë Kosnett.
Ai e mbyll mesazhin duke thënë se si Amerika e si Kosova, ndajnë të njëjtat vlera.
“Populli i Shteteve të Bashkuara dhe populli i Kosovës ndajnë shumë vlera dhe atribute. Popujt tanë janë të fortë e të zgjuar, kreativë e shpirtmirë, të shkathët e elastikë. Si miq dhe partnerë, i jemi përgjigjur njëri-tjetrit kur kemi pasur nevojë”, shprehet Kosnett. /tesheshi.com/
