Aktivistët arabë në rrjetet sociale bënë thirrje për mosbindje civile në vendet arabe në përgjigje të gjenocidit që Izraeli po kryen kundër popullit palestinez të Gazës, si dhe rrethimit të ambasadave amerikane dhe izraelite në vendet arabe që normalizojnë marrëdhëniet me krijimin sionist. Aktivistët e nisën këtë fushatë me hashtagun “Mosbindje civile deri në fund të gjenocidit”.
Gjithashtu, u bënë thirrje për protesta masive, pezullim të të gjitha aktiviteteve dhe protesta para ambasadave me qëllim të krijimit të presionit më të madh ndërkombëtar për ndalimin e gjenocidit në Rripin e Gazës.
Aktivistët bënë thirrje për protesta përmes rrjetit X në Egjipt dhe Jordani, vendet më të afërta me Palestinën e pushtuar. Ndërkohë, në Siri u mbajtën demonstrata të shumta, duke kërkuar reagim kundër agresionit të vazhdueshëm izraelit në tokën siriane, si dhe shprehjen e solidaritetit me Rripin e Gazës dhe dënimin e masakrave që po ndodhin atje.
Fetvaja e Unionit Botëror të Dijetarëve Islamë
Unioni Botëror i Dijetarëve Islamë (IUMS) lëshoi një fetva duke dënuar agresionin e vazhdueshëm të Izraelit kundër Gazës, duke e quajtur atë një “sulm gjenocidal të mbështetur nga SHBA” dhe duke u bërë thirrje të gjitha vendeve muslimane për ndërhyrje të menjëhershme ushtarake, ekonomike dhe politike. Fetvaja u bën thirrje kombeve dhe shteteve islame që të përmbushin detyrimet e tyre fetare dhe morale ndaj popullit të Gazës, duke theksuar se mbështetja e rezistencës në Palestinë është detyrë fetare e çdo muslimani.
Detyrimi i ndihmës ushtarake dhe xhihadit
Komiteti i Ixhtihadit dhe Fetvasë i IUMS thekson se lufta kundër entitetit sionist dhe aleatëve të tij është një detyrë fetare (farzi’ajn) e çdo muslimani të aftë dhe mbi të gjitha një detyrim i palestinezëve dhe vendeve fqinje: Egjiptit, Jordanisë dhe Libanit. Ky angazhim përfshin mbështetjen ushtarake, logjistike dhe të inteligjencës. Përveç kësaj, ajo bën thirrje për formimin e një aleance të vetme ushtarake të vendeve arabe dhe islame për mbrojtjen e territoreve myslimane. /tesheshi.com/
