Ministri i Kosovës për Administratë dhe Vetëqeverisje Lokale, Elbert Krasniqi, duke komentuar njërën nga kërkesat e presidentit të Serbisë, Aleksandar Vuçiç, lidhur me mbajtjen e zgjedhjeve në katër komuna në veri, tha se nuk e sheh mundësinë e tyre për t’u mbajtur para tetorit të vitit 2025.
Krasniqi ka thënë se sipas Udhëzimit Administrativ, zgjedhjet në katër komunat e veriut mund të mbahen në prill të vitit 2025, një vit pas votimit për shkarkimin e kryetarëve shqiptarë, por se nuk ka nevojë për këtë, duke qenë se zgjedhjet lokale janë në tetor 2025.
“Për të qenë të qartë, zgjedhjet në katër komunat e veriut mund të mbahen gjatë muajit prill të vitit 2025, por meqenëse kalendari i zgjedhjeve lokale është caktuar në tetor të po atij viti, nuk shoh mundësi që zgjedhjet në këto komuna të tjenë më herët”, tha Krasniqi.
Kërkesat e Vuçiçit
Shpallja e zgjedhjeve lokale në veri të Kosovës, kthimi i serbëve në policinë dhe drejtësinë e Kosovës dhe tërheqja e forcave speciale të policisë së Kosovës, këto janë kërkesat kryesore të Beogradit për vazhdimin e dialogut Beograd-Prishtinë, siç kumtoi presidenti serb të enjten.
Vuçiç prezantoi edhe një sërë masash që Serbia do t’i zbatojë pas ngjarjeve dhe tensioneve të fundit në veri të Kosovës. Ndër to është formimi i Prokurorisë Speciale që do të ndjekë penalisht ata që marrin pjesë në persekutimin e serbëve, si dhe miratimi i ligjit që do të sigurojë ndihmë financiare për të papunët në Kosovë. /tesheshi.com/
