Me organizimin e një kuvendi mbarëserb dhe miratimin e “Deklaratës për mbrojtjen e të drejtave kombëtare dhe politike dhe të ardhmes së përbashkët të popullit serb”, regjimi i Vuçiçit, me rolin pasiv të presidentit të Srpksa-s Milorad Dodik dhe bekimin e Patriarkut Porfiri, deklaroi qartë se Serbia nuk i përket hapësirës politike evropiane, se nuk njeh dhe nuk dëshiron të zbatojë trashëgiminë themelore të projektit evropian të paqes dhe integrimit evropian – komentojnë kështu media të rajonit.
Dinko Gruhonjiç, profesor nga Fakulteti Filozofik në Novi Sad, përshkroi se çfarë lloj mesazhesh u dërgoi Vuçiç botës dhe rajonit.
“Ai dërgoi mesazhin e zakonshëm se nuk do ta lërë të qetë rajonin dhe se do të vazhdojë të nxisë luftë. Të gjitha mesazhet nga ai i ashtuquajturi kuvend gjithë-serb ishin në mënyrën e zakonshme të nacionalizmit serbomadh militant: në njërën dorë një lule dhe një thirrje e supozuar për paqe, në anën tjetër një thikë. Fatkeqësisht, ajo të kujton skenën kur Ratko Mlladiç u jep karamele fëmijëve në Srebrenicë dhe më pas kryen gjenocid…”. /tesheshi.com/
