Gjykata Federale e Australisë ka bërë të ditur arsyet pse Novak Gjokoviçit iu refuzua ankesa kundër heqjes së vizës, ku për këtë arsye ai u pengua të marrë pjesë në Australian Open, transmeton Reuters.
Argumentohet se gjykata ka fuqinë, sipas Ligjit të Migracionit, të anulojë një vizë nëse Ministri i Emigracionit beson se “ekziston një bazë ligjore për anulimin”. Gjithashtu u tha se gjyqtarët, të cilët vendosën për këtë, besonin se heqja e vizës ishte në interes të publikut.
Sipas gjyqtarëve, Gjokoviç ishte një rrezik për shëndetin, rendin dhe interesin publik.
“Edhe nëse ai nuk do të fitonte Australian Open, vetëm prania e tij dhe duke luajtur tenis mund të inkurajonte ata që do ta imitonin atë, duke besuar se një qëndrim kundër vaksinës është një bazë racionale për qëndrimin,” thanë gjyqtarët.
Sipas gjykatës, “nuk është irracionale apo e palogjikshme” që të arrihet në përfundimin se prania e Gjokoviçit në Australi mund të kishte rrezikuar komunitetin, edhe nëse të tjerët nuk do të kishin një qëndrim të tillë.
Pasi iu refuzua viza për të dytën herë para disa ditësh dhe u urdhërua deportimi, tenisti më i mirë në botë u kthye të hënën në Beograd.
Gjokoviç mbërriti në Australi më 5 janar kur iu hoq viza dhe u vendos në hotelin Park në Melburn, një strehë për emigrantët ku kaloi katër netë.
Më pas, gjykata e shpalli të pafajshëm, duke vendosur se vendimi për anulimin e vizës pas mbërritjes në Australi ishte i pabazuar për shkak të mosrespektimit të procedurës.
Ministri i Emigracionit Alex Hawke vendosi më pas të revokojë vizën e Gjokoviçit sepse qëndrimi i tij në vend mund të nxiste kundërshtimin ndaj vaksinimit kundër COVID 19 në Australi dhe Gjokoviç u kthye te streha për migrantët.
Në reagim ndaj vendimit, Gjokoviç tha në rrjetet sociale se ishte “jashtëzakonisht i zhgënjyer”, por se e respektoi vendimin e gjykatës.
Ndërkohë, kryeministri australian Scott Morrison ia la të hapur derën Novak Gjokoviçit për të konkurruar në Australian Open vitin e ardhshëm, pavarësisht se tenisti më i mirë në botë po përballet me një ndalim prej tre vitesh për të hyrë në atë vend.
“Ndalimi është i vlefshëm për tre vjet, por ekziston mundësia që (personi) të lejohet të hyjë në rrethana të përshtatshme”, tha Morrison.
Pas deportimit të Gjokoviçit nga Australia, u bë e qartë se ai nuk do të mund të garojë në Grand Slam të tjerë, por edhe në turne më të vogla, nëse ndërkohë nuk vaksinohet. /tesheshi.com/
