21 qershori është dita kur në Kosovë u rrëzua miti historik i shqiptarit që nuk e lëshon armën nga dora. Dhe kjo ndodhi pikërisht me UÇK. 17 vjet më parë, u nënshkrua marrëveshja për demilitarizimin e kësaj ushtrie, së cilës i dedikohet një pjesë e çlirimit të Kosovës. Në marrëveshje u përfshinë në detaje fazat e dorëzimit të armëve, mbajtjes së uniformave, kalimin e një pjese të pjesëtarëve të UÇK-së në polici dhe administratë publike, etj.
Në marrëveshje u parapa gjithashtu formimi i Ushtrisë së Kosovës në vijat e Gardës Kombëtare të SHBA-ve, duke marrë parasysh Marrëveshjen në Rambuje.
E gjithë kjo fazë pati një periudhë prej 90-të ditësh pas së cilës u bë demilitarizimi i plotë i UÇK-së dhe në shtator 1999, u nënshkrua marrëveshja për formimin e TMK-së, jo si forcë ushtarake, siç ishte paraparë në këtë marrëveshje por si forcë emergjente për reagime në raste katastrofash natyrore.
Nënshkrues të marrëveshjes ishin: Hashim Thaçi në pozitën e kryekomandantit të UÇK-së, Agim Çeku në pozitën e shefit të shtabit të UÇK-së dhe është pranuar nga lejtnant-gjeneral, Mike Jackson, komandant i KFOR-it. /tesheshi.com/
