Ministri i Brendshëm, Saimir Tahiri njoftoi nisjen më 15 nëntor të procesit të regjistrimit të popullsisë. Dhe sipas tij, ky do të jetë një regjistrim real i banorëve të Shqipërisë.
“Është procesi më i rëndësishëm për të pasur më në fund një pasqyrë të denjë dhe reale në fund të të cilës do kemi një Shqipëri si në letër ashtu edhe në realitet”, sqaroi Tahiri.
“Ne jemi në fazën më të rëndësishme të popullimit. Me kryetarët e bashkisë e kam ndarë pjesën më të madhe të këtij procesi. Janë mjaft të vetëdijshëm për detyrat që ka secili. Në Zyrat e Urbanistikës janë mjaft të vetëdijshëm për detyrat që ka çdo zyrë, çdo punonjës, çdo ndërlidhës me komunitetin, çdo kryeplak, çdo punonjës i Policisë së Shtetit në çdo zonë. Ajo që duhet është që të mos neglizhojmë”, shtoi më pas ministri i Brendshëm, sipas së cilit janë 1.200 të rinj të cilët do të angazhohen ditë për ditë për 6 muaj radhazi për të bërë këtë regjistrim. /tesheshi.com/
