Ashtu si çdo moshë edhe fëmijët kanë pasionet dhe interesat e tyre. Mathew Flores, 12 vjeç me banim në Utah të Shteteve të Bashkuara të Amerikës, është i apasionuar pas letërsisë më shumë se pas çdo gjëje tjetër.
Por leximi në shtëpinë e tij ishte vërtetë i pamundur, pasi familja nuk ka libra dhe as mundësi ekonomike për t’i blerë ata. Për këtë arsye, i riu nisi të lexojë rregullisht gazetat dhe broshurat që reklamonin produkte të caktuara. Me pak fjalë gjithë gazetat që dërgohen në kutitë postare të banesave dhe që më pas hidhen poshtë rregullisht.
Me kaq Mathew plotësonte dëshirën e tij për të lexuar, deri kur takoi Ron Lynch, postierin e zonës. Në momentin e takimit, Mathew po lexonte disa fletëpalosje të cilat i kishte gjetur në kutinë e letrave.
Ai i kërkoi Lynch nëse kishte ndonjë material që mund t’i jepte dhe postieri nisi të interesohej dhe bisedojë me të. Ai i propozoi të riut që të shkonte në bibliotekë dhe të merrte libra, por Mathew i tha se nuk kishte para për të udhëtuar me autobus.
Në këto kushte postieri vendosi që ta ndihmojë, duke publikuar një apel në Facebook, ku shkruhej, “Të dashur miq të Facebook. Ky është Mathew Flores. Sot, teksa dorëzoja postën në kompleksin e apartamenteve ku jeton, e pashë duke lexuar disa broshura dhe ai më pyeti nëse kisha ndonjë gjë tjetër që ai ta lexonte. Më tha se dëshira e tij më e madhe ishte që të kishte libra për të lexuar. I thashë se në bibliotekë kishte shumë, por ai nuk mund t’ia lejonte vetes biletën e autobusit. Forca, le t’i japim këtij 12 vjeçari disa libra. Le t’a ndihmojmë. Kur isha fëmijë kam marrë shumë libra, dhe tani ka ardhur koha që të ndihmojmë të tjerët”.
Apeli i tij u publikua gjerësisht në rrjetet sociale dhe tashmë shtëpia e Mathew Flores është e mbushur plot me libra. /tesheshi.com/
