Janë qindra qytetarë ata që do të vizitojnë gjatë orëve të ardhshme memorialin e Tsitsernakaberd, i vendosur në kodrën Dzidzernagapert, në kujtim të Gjenocidit Armen, të kryer nga perandoria e Turqve të rinj në kohën e perandorisë Osmane rreth 100 vjet më parë.
Sot e gjithë bota do të kujtojë 100 vjetorin e masakrës osmane ndaj armenëve. Nga Teherani në Stamboll, nga Jerusalemi në Berlin, nga Montevideo në Paris, njerëzit janë mbledhur në këtyë shesh për të mos harruar.
Në Armeni kanë nisur që në orët e para të ditës së sotme ceremonitë zyrtare. Presidenti Serzh Sargsian, i shoqëruar nga bashkëshortja Rita, ka vendosur një kurorë me lule pranë flakës së përjetshme. “Përparimet e fundit në njohjen e gjenocidit armen duhet të ndihmojnë për të larguar errësirën 100 vjeçare të mohimit. Qeveria jonë është e gatshme për normalizimin e situatës me Turqinë”,- ka thënë Presidenti.
Të shumta kanë qenë edhe delegacionet e huaja pjesëmarrëse në ceremoni. Që prej mbrëmjes së djeshme ka mbërritur në Erevan presidenti rus, Vladimir Putin. Të pranishëm janë edhe presidenti francez Francois Hollande, presidenti qipriot Nikos Anastasiades dhe ai serb Tomislav Nikolic.
“Asnjë gjë nuk mund të justifikojë masakrat masive. Rusia është bërë promotore e një numri të madh iniciativash ndërkombëtare për modernizimin e legjislacionit penal. Mes tyre përfshihet edhe Konventa për Parandalimin e Torturës dhe Krimit të Gjenocidit që identifikon atë si një akt të ndaluar me të drejtën ndërkombëtare”,- tha Presidenti Putin./tesheshi.com/
