Deputetëve të Lëvizjes Vetëvendosje, Albin Kurti, Albulena Haxhiu dhe Donika Kadaj-Bujupi, të cilët u arrestuan sot derisa po hynin në seancën e Kuvendit të Kosovës, u është shqiptuar masa e paraburgimit prej 30 ditësh.
Ndaj këtij vendimi ka reaguar kryevetëvendosësi Visar Ymeri, duke thënë se ky dënim vjen nga “Klani Pronto”, porse lëvizja e tyre nuk do të ndalet.
“30 ditë paraburgim për deputetët, Albulenën, Donikën dhe Albinin. Prapë Beqir Kalludra.
Prapë Klani Pronto me shokë e paterica.
Të njëjtit që dje i dënuan aktivistët pa asnjë faj. Pa asnjë provë a bazë.
Të njëjtit që po duan t’ua vjedhin fitoren qytetarëve në zgjedhjet lokale.
Persekutimi është i drejtuar kundër VETËVENDOSJE!-s. Sepse vetëm VETËVENDOSJE!-n e kanë pengesë në ndërmarrjen e tyre kriminale. Sepse janë kundër vullnetit popullor.
Dhe pengesë do të na kenë. Përjetësisht. Kundër krimit.
Liri për deputetët.
Liri për aktivistët”, ka shkruar Ymeri në Facebook. /tesheshi.com/
