Tre shtetas të huaj u arrestuan në kushtet e flagrancës nga policia kufitare në Qafë Thanë me akuzën e trafikut ndërkombëtar të lëndëve narkotike.
Sipas një deklarate zyrtare të Policisë së Shtetit, në dalje të Republikës së Shqipërisë, janë goditur dy raste të trafikut të drogës, si rezultat i të cilëve u bë e mundur kapja dhe arrestimi në flagrancë i shtetasve Jozef Drynda, 23 vjeç dhe Mikolaj Drynda, 47 vjeç.
Si edhe u bë shpallja në kërkim e shtetases S.H, 25 vjeçe të tre banues në Poloni, kjo e fundit si bashkëpunëtore e dyshuar në këtë vepër penale me dy shtetasit e mësipërm, për të cilën për shkak të hetimeve nuk mund të jepen të dhëna të tjera.
Shtetasi Jozef Drynda është paraqitur në dalje me automjetin tip “Volkswagen” me targa OKL30821 me të cilin udhëtonte së bashku me babain e tij. Nisur nga dyshimet e shfaqura se në këtë mjet mund të ishte fshehur lëndë narkotike shërbimet e Policisë Kufitare, bënë përzgjedhjen e tij për verifikim në vijën e dytë. Gjatë kontrollit të detajuar përfshi edhe procesin e skanimit të kryer në bashkëpunim me Doganën, konkretisht në pjesën e poshtme të sediljes së pasagjerit, si edhe tek shasia e mjetit poshtë dyshemesë, iu gjetën e sekuestruan në cilësinë e provës materiale 69 pako me peshë 24 kg e 400 gram lëndë e dyshuar si narkotike Cannabis Sativa.
Gjithashtu shërbimet e Policisë Kufitare, kanë konstatuar edhe një rast tjetër, si rezultat i të cilit u bë kapja dhe arrestimi në flagrancë i shtetasit zvicerian Gabrijel. L, 28 vjeç, si edhe filloi procedimi penal në gjendje të lirë ndaj shtetasit M.D, 25 vjeç, të dy banues në Zyrih-Zvicër.
Gjatë kontrollit të detajuar, të ushtruar në vijën e dytë të mjetit të tyre tip “BMW” me targa ZG42268, iu gjetën e sekuestruan në cilësinë e provës material 12 gram lëndë narkotike e dyshuar si Cannabis Sativa. /tesheshi.com/
