728 x 90 Leaderboard

Mungesa e stafit akademik në Universitetin e Prishtinës: a është vërtet gjendje e nderë te Mjekësia?

Nga Blendi Gashi

Një prej krizave të pasluftës në Kosovë, është dhe ai në sistemin arsimor. “Delja e zezë” është bërë pikërisht arsimi i lartë, aty ku janë drejtuar dhe kritikat e akuzat me të shumta, sidomos për shndërrimin e saj në biznes. Faji për këtë i është lënë gjithnjë politikës, e cila i ka mbushur ketadrat me njerëz partiakë.

Çështja e mungesës së kuadrit arsimor, sidomos në Fakultetin e Mjekësisë së fundmi është bërë “mollë sherri” edhe mes drejtuesve të Ministrisë së Arsimit dhe profesorëve të caktuar.

Kështu, në distancë, përmes rrjeteve sociale, janë përplasur ministri i Arsimit Shyqeri Bytyqi dhe profesori universitar Milazim Krasniqi.

“E gjitha ka nisur pasi ministri Bytyqi diskutoi me ministrin e Shëndetësisë, Uran Ismaili, për krizën personelit mësimdhënës në Fakultetin e Mjekësisë.

“Sipas informatave të prezantuara (në tryezë) situata është shqetësuese, sepse Fakulteti i Mjekësisë shkon përtej edukimit të shoqërisë, duke qenë se kemi të bëjmë me edukimin dhe shëndetin e njerëzve. Duhet ta dimë saktësisht cilat kanë qenë shkaqet që e kanë sjellë situatën deri këtu, në mënyrë që kur të japim propozime për zgjidhjen, të mos na përsëritet situata që ka qenë paraprakisht. Nëse ka kuadro të mjaftueshme, por mungon riorganizimi, atëherë Ministria e Arsimit dhe Ministria e Shëndetësisë do të mbështesin zgjidhjen e këtij problemi, i cili flet për një problem ku përfshihen dy institucione të rëndësishme: Fakulteti i Mjekësisë dhe QKUK-ja”, shkruan ministri Bytyqi në Faceook.

Ndaj kësaj deklarate të tij ka reaguar profesor Milazim Krasniqi, i cili thotë se kur ministri i Arsimit shfaqet i çuditur me gjendjen në arsim, gjendja duhet të jetë më keq; ndërsa pohon të kundërtën sa i përket stafit në Fakultetin e Mjekësisë duke thënë se ka tepricë, por hedh dyshimet për keqpërdorime.

Fakulteti i Mjekësisë është më pak në krizë se sa shumica e fakulteve të tjera, pasi atje ka raste që lëndët kirurgji, gjinekologji, neuropsikiatri, pediatri, e ligjërojnë nga 10 mësimdhënës! Pra, ministri ka konstatuar se ka mungesë mësidhënënësish, atje ku realisht ka tepricë. Në fakt, këtu është fjala edhe për konfuzion, abuzime dhe ndoshta edhe shkelje ligjore, sepse ata marrin pagën e parë si mësimdhënës në UP, ndërsa pagën e dytë si mjek në QKUK, ndërsa realisht ata janë të punësuar më shumë në QKUK se sa në UP. Pse shfaqet kështu keq ministri ynë i arsimit, i çuditur me gjërat që nuk janë për t’u çuditur, po për t’u zgjidhur. Sepse e tërë politika në arsimin e lartë është  improvizim, dhënie e favoreve personave e grupeve, e jo përgjigje korrekte dhe sipas prioriteteve që imponon interesi publik dhe tregu i punës.  Për keqardhje, vërtet: je futur në skemën  e paraardhësit tënd! Grahi si të duash, veç mos pritë me të thanë puna e mbarë!”, shkruan Krasniqi në Facebook.

Në UP mungojnë mbi 1 mijë mësimdhënës dhe së paku 500 asistentë…

Profesor Krasniqi pa u kapur në shifra stritike tregon për mungesën e stafit akademik në UP dhe si maskohet situata.

Në Universitetin e Prishtinës mungojnë më shumë se 1000 mësimdhënës me gradën doktor shkence dhe sigurisht edhe më së paku 500 asistentë, me gradën master dhe candidate PhD. Mungesat kanë pllakosur çdo departament, çdo njësi akademike, gjithë UP-në. Këto mungesa të mësimdhënësve në UP, me vite maskohen në dy mënyra 1) me angazhimin e bashkëpunëtorëve të jashtëm (të cilët paguhen gjysmë për gjysmë në krahasim me stafin e rregullt, sigurisht edhe punojnë pak a shumë gjysmë për gjysmë) dhe me mbinormat e mësimdhënësve e asistentëve të rregullt, që pothuajse secili e mbulon një mësimdhënës të munguar, duke mbajtur orë mbi normë. (Duke u ngarkuar ashtu me dy norma, sigurisht që edhe cilësia e mësimdhënies së tyre bie shumë!)”, tregon Krasniqi.

Profesor Krasniqi më tej thotë se nuk e di nëse është i njoftuar ministri Bytyqi për këtë gjendje nga Këshilli Drejtues dhe rektori i UP-së, por nëse kjo nuk ka ndodhur këta të fundi kanë pjesën e përgjegjësisë, sepse si pasojë e mungesës së mësimdhënësve, disa programe të UP-së janë pezulluar, ku përmend master në gazetari dhe kontakteve me publikun, që nga agjencia është maskuar me mungesë të stafit.

Krasniqi më tej shprehet se Këshilli Drejtues i UP-së dhe  Senati, duke zbatuar politikat resktriktive të Ministrisë së Financave, kanë penguar e pengojnë pranimin e mësimdhënësve të rinj edhe në departametin e gazetarisë, për çka sipas tij kështu UP-ja bllokohet, ndërsa u krijohet mundësi e konkurencës jolojale kolegjeve private, sepse ata mund të punësojnë mësimdhënës brenda ditës.

Kujtojmë se Senati i Universitetit të Prishtinës në mbledhjen e mbajtur të enjten, pas shumë diskutimeve vendosi që të hap konkurs vetëm për 62 vendeve në këtë institucion arsimor (kaq u tha lejon buxheti) edhe pse nevojat janë tejet më të mëdha. /tesheshi.com/

 

Related posts