Mesfushori i përfaqësueses gjermane ka nënshkruar një kontratë pesëvjeçare me Mançester Sitin, duke e lënë Shalke 04-tën vetëm një vit pasi luajti me ekipin e parë.
Vetëm 20 vjeç, Sane shënoi tetë gola në 33 ndeshje që luajti me Shalken në Bundesligë. Ai deklaroi me zyrtarizimin e tranferimit se arsyeja pse iu bashkua skuadrës angleze ishte dëshira për të punuar me Pep Guardiola-n.
“Mendoj se ai mund të më bëjë një lojtar më të plotë,” tha Sane për teknikun spanjoll.
Vetë Guardiola do ta lëvdonte fort mesfushorin e talentuar: “Ai ka aftësi të mëdha teknike, është i shpejtë, punon fort për ekipin dhe shënon gola. Gjithashtu ka një sjellje shumë të mirë.”
Sane gjen te Mançester Siti Ilkay Gündoğan-in, i cili u largua më herët nga Borusia e Dortmundit për të luajtur në Premier League. /tesheshi.com/
