Zv.ndihmëssekretari amerikan i shtetit për çështje evropiane dhe euroaziatike, Hoyt Brian Yee, i cili po qëndron për vizitë në Kosovë, ka shprehur shqetësimin e për iniciativën për formimin ushtrisë përmes ndryshimit të ligjit.
Mesazhin e Uashingtonit, zyrtari Hoyt Yee ja përcolli ministrit të FSK-së, Haki Demolli pas një takimi që zhvilloi sot me të, ku i pranishëm ishte edhe gjenerallejtënant Rrahman Rama.
Në kumtesën e MFSK-së thuhet se ministri Demolli e falënderoi zyrtarin amerikan për ndihmën që SHBA-të po japin për FSK-në., dhe vlerësoi lartë bashkëpunimin e dy shteteve dhe në veçanti Partneritetin e Bashkëpunimit me Gardën Kombëtare të Ajovës.
“Ministri Demolli e njoftoi Yee edhe me bashkëpunimin rajonal dhe atë ndërkombëtar, pjesëmarrjen e FSK-së në shumë trajnime me karakter rajonal, si dhe sukseset e arritura në garat ndërkombëtare. Gjithashtu ministri Haki Demolli, zotin Yee e njoftoi edhe për bashkëpunimin me DIRI-in në procesin e planifikimit të transformimit të FSK-së, si edhe me ecurinë e zhvillimit të procedurave për projektligjin për zgjerimin e misionit të FSK-së”, thuhet në kumtesë.
Kujtojmë se Hoyt Yee dje ka takuar kryekuvendarin Kadri Veseli, kreu e VV-së Visar Ymeri, deputetët e PDK-së Zenun Pajaziti e Ilmi Reçica, deputetët e LDK-së Anton Quni e Vjosa Osmani, deputetin e pavarur Ilir Deda, por jo presidentin Thaçi. /tesheshi.com/
