Londra do të ketë tani e tutje më shumë punonjës policie të armatosur në rrugët e saj, posaçërisht në zonat më të njohura. Kjo masë synon t’i përcjellë një siguri më të madhe popullsisë, e po ashtu t’i frenojë ideatorët e sulmeve të mundshme.
Njoftimin e ka bërë shefi i Policisë Metropolitane, Sër Bernard Hogan-Howe, që ka deklaruar se numri i punonjësve të armatosur të policisë do të shtohet me 600 të tillë, duke e çuar atë në 2.800.
Ai tha se në Britani ekziston një ndjesi frike, edhe pse nuk ka të dhëna për sulme të afërta terroriste.
“Nuk kemi informata se do të ketë së shpejti një sulm, por çfarë dimë është ajo që kemi parë në Europën Perëndimore,” sqaroi kreu i policisë.
Kryebashkiaku i Londrës, Sadiq Khan, pohoi të njëjtën gjë, duke shtuar, “Eshtë e rëndësishme që londinezët të risigurohen se shërbimi policor, shërbimi i sigurisë, të gjithë ne, po bëjmë pjesën tonë për t’i mbajtur ata të sigurt në qytetin tonë.” /tesheshi.com/
