Një zyrtare e lartë e Ministrisë së Arsimit është kapur duke vjedhur në një dyqan në Bruksel gjatë javës. Në mediat e Prishtinës është informuar mbi rastin, por emri i saj nuk është publikuar.
Ajo, për një moment gjatë vizitës është ndarë nga pjesa tjetër e delegacionit, dhe pasi që është vonuar, delegacioni është alarmuar dhe ka nisur ta kërkojë.
Sipas burimeve të KTV-së, zonja ka blerë disa sende në dyqan e disa të tjera i ka futur në çantë. Vlera e sendeve të vjedhura ishte 40 euro.
Lëvizjet e saj janë përcjellë vazhdimisht nga sigurimi i dyqanit dhe gjithçka është kapur gjithashtu nga kamerat e sigurisë.
Sigurimi e ka pritur, derisa zyrtarja kosovare ka provuar të dalë nga dyqani me rrobat e vjedhura dhe e kanë ndaluar duke ia marrë ato.
Sigurimi e ka ftuar Policinë e cila e ka intervistuar zyrtaren e MASHT-it, e cila më pas është liruar dhe i është ribashkuar delegacionit.
Ministri i Arsimit, Shyqiri Bytyqi, i ka thënë KTV-së se zyrtarja në fjalë është suspenduar menjëherë pas rastit në pritje të informacioneve të tjera zyrtare
Kujtojmë se gjatë kësaj jave, ministri i Arsimit, ka udhëhequr një delegacion të MASHT-it që ka marrë pjesë në takimin e 7-të ministror në kuadër të Platformës së Ballkanit Perëndimor për Arsim, Trajnim, Hulumtim dhe Inovacion. /tesheshi.com/
