Është vendosur përfundimisht që marrëveshja për Demarkacionin me Malin e Zi të procedohet të hënën e javës së ardhshme në Kuvend, ku deputetët përmes votës do thonë fjalën e fundit, nëse do ratifikohet apo ajo.
Një vendim i tillë është marrë pas një bisede që zhvilloi sot zv.ndihmëssekretari amerikan i shtetit, Hoyt Yee, me kryeministrin Isa Mustafa.
“Gjatë bisedës u diskutua për nevojën që të procedohet pa vonesë Demarkacioni në Kuvend Zi, si një prej marrëveshjeve më të rëndësishme për vendin. Mustafa dhe Yee u pajtuan që të hënën qeveria t’ia procedojë Kuvendit projektligjin për ratifikimin e marrëveshjes për shënjimin e vijës kufitare ndërmjet Kosovës dhe Malit të Zi. Si rrjedhim, qeveria e Kosovës do të mblidhet për këtë të hënën”, thuhet në kumtesë.
Më tej qeveria thotë se “Yee e konsideroi vendim të duhur adresimin e kësaj çështje të rëndësishme për Kosovën dhe qytetarët e saj, duke shprehur bindjen se kjo marrëveshje do të votohet nga të gjithë deputetët e Kuvendit”.
Pavarësisht bindjes së ekzekutivit për ratifikimin e Demarkacionit, opozita kosovare ka paralajmëruar kundërshtim të fuqishëm, ku Vetëvendosje ka paralajmëruar edhe hedhje të gazit lotësjellës.
Kujtojmë se më 1 shtator të vitit të kaluar Mustafa në momentin e fundit tërhoqi nga pikat e rendit të ditës marrëveshjen për Demarkacionit, me pretekstin se parti të caktuara nuk mund të shantazhojnë koalicionin qeverisës, e që fjalën e kishte për Listën Serbe, por më vonë u dëshmua se e ka tërhequr për shkak të mungesës së votave. /tesheshi.com/
