Sulmuesi francez, Karim Benzema, patjetër do të mungojë në Kupën e Botës për shkak të një dëmtimi, ka konfirmuar kombëtarja franceze në llogarinë e tyre zyrtare në Twitter.
Fituesi aktual i Topit të Artë ndjeu dhimbje në kuadricepsin e majtë gjatë seancës së dytë stërvitore të kombëtares franceze, pas së cilës u stërvit ndaras nga grupi.
Pas stërvitjes të së premtes, të cilën e ka punuar individualisht, ai iu bashkua skuadrës të shtunën, por nuk e zgjati stërvitjen deri në fund pasi u dërgua për rezonancë magnetike, rezultatet e së cilës nuk ishin të kënaqshme.
“Jam jashtëzakonisht i trishtuar për Karimin që e ka bërë këtë Botëror synimin e tij kryesor”, ka reaguar trajneri Didier Deschamps. “Pavarësisht kësaj goditjeje të re për ekipin francez, unë kam besim të plotë në grupin tim. Do të bëjmë gjithçka për të përballuar sfidën e madhe që na pret”.
Në moshën 34-vjeçare, sulmuesi i Realit dhe Tringjyrëshit ndoshta nuk do të luajë kurrë në Botërorin e tij të dytë, pas atij të 2014-ës, në të cilin përfundoi si golashënuesi më i mirë i Francës. /tesheshi.com/
