Donald Trump pati premtuar gjatë fushatës elektorale presidenciale se do ta zhvendoste ambasadën amerikane në Izrael nga Tel-Avivi në Jerusalem. Në shkurt, ai do të deklaronte në një intervistë për një gazetë izraelite se, “Po mendoj mbi çështjen. Të shohim se çfarë do të ngjasë. Nuk është një vendim i lehtë.”
Pikërisht për të studiuar propozimet për zhvendosjen e ambasadës amerikane në Jerusalem, një delegacion i Kongresit amerikan e viziton sot Izraelin.
Një anëtar i parlamentit izraelit, Yehuda Glick, njoftoi përmes rrjetit social Facebook se delegacioni amerikan do të takohej me kryeministrin Netanyahu dhe me zyrtarë të tjerë për të diskutuar rrjedhojat praktike dhe politike të zhvendosjes së ambasadës së SHBA-së në Jerusalem.
Mbi vizitën e sotme nuk jepen hollësi të mëtejshme, por ajo çfarë mund të thuhet me siguri është se nëse konkretizohet premtimi i Trump-it, pasojat në rajon do të jenë të paparashikueshme.
John Kerry, ish-sekretari amerikan i Shtetit, pati thënë në janar se zhvendosja e ambasadës mund të çonte në një “shpërthim” në Lindjen e Mesme.
Çështja e Jerusalemit është në qendër të konfliktit izraelito-palestinez. Palestinezët e çmojnë Jerusalemin Lindor si kryeqytet të shtetit të tyre të ardhshëm, ndërsa Izraeli e pretendon atë tërësisht si të tijin. /tesheshi.com/
