Dy javë pasi u emërua kryeministër, saktësisht më 25 shtator, Haradinaj gjatë një vizite në polici u zotua se me kryepolicin Shpend Maxhuni janë dakorduar që fokusi kryesor në siguri mbetet parandalimi i shpërndarjes së narkotikëve tek fëmijët.
Një muaj më vonë janë dhënë edhe rezultatet e para në luftën anti-drogë në shkolla, ku policia gjatë periudhës kohore nga 23 – 29 tetor ka vënë në pranga katër shpërndarës të drogës dhe 18 konsumues.
“Në fushën operacionale janë kontrolluar persona të cilët kanë frekuentuar në zonën e sigurisë 300 m rreth shkollave, po ashtu janë kontrolluar vetura, lokale dhe vende tjera të dyshuara. * Për periudhën raportuese janë realizuar: 225 vizita dhe kontakte me personelin e shkollave, 437 patrullime rreth shkollave, 459 persona të kontrolluar, 194 vetura të kontrolluara, 18 lokale të kontrolluara, 6 ligjërata në shkolla, 460 pjesëmarrës, nxënës, 170 fletushka.
Si rezultat i angazhimit të shtuar janë iniciuar 17 raste, arrestuar 22 persona. Gjithsejtë janë konfiskuar: marihuanë 395.05 gramë (2.65 gramë marihuanë në shkolla, pjesa tjetër në perimetrin 300 m) heroinë 267,5 gramë, 4005 euro, një revole/54 fishekë.
Bazuar në të dhënat statistikore dhe aktivitetet në terren vërehet se numri më i madh i rasteve është iniciuar në perimetrin e sigurisë prej 300 m rreth shkollave, si në parqe, rrugë e hapësira të tjera.
Prej 17 rasteve, një rast brenda oborreve, një rast afër oborreve të shkollave, 15 raste në perimetrin prej 300m.
Prej numrit të përgjithshëm të 22 të arrestuarve, 4 persona janë shpërndarës të drogës, 18 konsumues”, thuhet në deklaratë.
Policia thotë se mbetet e përkushtuar në luftën kundër veprave kriminale dhe në veçanti luftës ndaj trafikimit me narkotikë. /tesheshi.com/
