Çështja e Demarkacionit që po e rëndon politikën e brendshme të Kosovës për më tepër se dy vite me gjasë do jetë në tryezë edhe për një kohë të gjatë. Arsyeja është se si për Malin e Zi ashtu edhe për Brukselin marrëveshja e nënshkruar nga Thaçi është e mbyllur dhe nuk ka kthim mbrapa, andaj qeverisë “Haradinaj” i mbetet të gjejë një zgjidhje.
Të paktën kështu ka lënë të nënkuptohet zv.kryeministri Behgjet Pacolli, në raportimin që bëri të hënën para anëtarëve të komisionit për Punë të Jashtme, Diasporë dhe Investime Strategjike.
Pacolli më tej shtoi se iu ka shpjeguar përfaqësuesve të Malit të Zi, se një pjesë e përfaqësuesve në Kosovë nuk e përkrah Demarkacionin, por ka marrë këtë përgjigje: “Rinegocimi i marrëveshjes do të jetë kohë e humbur”.
Ai tha se puna mbetet të bëhet tek politika kosovare, pasi edhe në Bruksel i është thënë se Kosova duhet ta kryej marrëveshjen në fjalë.
Pacolli tha se Demarkacioni nuk duhet kurrsesi të ndërhyjë në marrëdhëniet e mira mes dy shteteve.
“Unë isha në një takim në New York, ku Mali i Zi ishte ai që i printe çdo iniciative që ishte në të mirë të Kosovës dhe për këtë unë e falënderoj Malin e Zi”, tha ai. /tesheshi.com/
