Më i miri lojtar i Suedisë, sulmuesi 34-vjeçar, ka lajmëruar sot se do t’i vërë kapak futbollit ndërkombëtar në nivel përfaqësuesesh.
Ibrahimoviç ka dalë para gazetarëve, duke deklaruar: “Ndeshja e fundit e Europianit do të jetë ndeshja e fundit e imja me Suedinë. Nuk kam për të marrë pjesë në Lojërat Olimpike.”
Përfaqësuesja suedeze gjendet në grupin E të Europianit, me vetëm 1 pikë pas dy ndeshjesh. Suedia do të luajë të mërkurën në mbrëmje ndaj Belgjikës, dhe kjo mund të rezultojë të jetë ndeshja e fundit për Ibrahimoviçin. Fati i ndeshjes do të vendosë dhe atë të futbollistit, që së fundi është larguar edhe nga francezët e PSG-së pas katër sezoneve të suksesshme.
“Kështu, ndeshja ime e fundit e Europianit do të jetë e fundit e imja. Prandaj të shpresojmë të zgjasë sa më shumë të jetë e mundur. Shpresoj që nesër të mos jetë ndeshja ime e fundit. Por nuk kam asnjë keqardhje.”
I veçantë në llojin e tij, Ibrahimoviç e bëri debutimin me kombëtaren e Suedisë më 31 janar të vitit 2001, për të luajtur në 115 takime, duke shënuar 62 gola.
“Nuk ka zhgënjim. Jam krenar të jem kapiteni i Suedisë. Dëshiroj ta shfrytëzoj këtë moment për t’i falënderuar tifozët për mbështetjen e përhershme kudo ku shkoj. Kam për ta mbajtur gjithmonë flamurin suedez me vete,” ka shtuar Ibrahimoviç përballë shtypit sportiv.
Ai ka një karrierë të gjatë në futbollin europian, duke luajtur me ca prej skuadrave më të mira të kontinentit, nga Ajaksi, Juventusi, Interi, Barcelona, Milani e PSG-ja. Pritet që në sezonin e ri ai të aktivizohet në radhët e Mançester Junajtedit. /tesheshi.com/
