Zjarri që ka përfshirë një platformë nafte në Detin Kaspik ka rezultuar fatal për 32 prej punëtorëve, të cilët kanë humbur jetën.
Ngjarja ka ndodhur në një platformë nafte në det në administrim të kompanisë shtetërore azerbajxhanase SOCAR. E njëjta kompani ka njoftuar se platforma është pushtuar nga flakët pas dëmtimit të një tubacioni gazi për shkak të erërave të forta. Operacionet e shpëtimit po ashtu janë vështirësuar për shkak të stuhisë.
Kompania shtetërore azerbajxhanase lajmëroi ditën e sotme në faqen e vet në Facebook se 26 punëtorë ishin shpëtuar, por pa dhënë njoftime të tjera.
Ndërkaq, ka qenë kryetari i Komitetit të Mbrojtjes së të Drejtave të Punëtorëve të Naftës të Azerbajxhanit ai që ka ofruar të dhëna më të hollësishme. “Sipas informacionit tonë, 32 punëtorë vdiqën, ndërsa 42 të tjerë u shpëtuan natën e shkuar. Zjarri në platformë u shua më në fund,” raportohet të ketë thënë ai.
Platforma në të cilën ra zjarri është me shumë rëndësi për kompaninë shtetërore SOCAR, pasi 60 për qind e prodhimit të naftës së kësaj kompanie kalon nëpërmjet saj. /tesheshi.com/
