Presidenti turk Rexhep Tajip Erdogan pati një sulm frontal ndaj Izraelit gjatë fjalimit të tij në Grupin Parlamentar të Partisë për Drejtësi dhe Zhvillim (AKP) të martën, duke theksuar se Turqia nuk do të tërhiqet në mbështetjen e saj për popullin palestinez dhe stabilitetin në Siri.
“Ne qëndrojmë të fortë kundër lobit global sionist. Ne nuk do t’u dorëzohemi tiranëve,” tha Erdogan, duke denoncuar gjakderdhjen e vazhdueshme në Rripin e Gazës dhe duke akuzuar qeverinë Netanyahu për gjenocid.
Presidenti turk iu referua edhe sulmeve izraelite në Siri, duke theksuar se Ankaraja kundërshton çdo përpjekje për të rishikuar kufijtë dhe për t’u zgjeruar në rajon. “Nga ekspansionizmi dhe hartat e reja nuk do të përfitojë askush. Ne duam stabilitet dhe paqe në Gaza, Siri dhe Liban,” tha ai.
Ai dënoi dhunën izraelite në Gaza, duke e quajtur atë “grabitje flagrante toke” dhe “krime të qarta lufte”. Madje, ai përmendi dhe sulmet ndaj autoambulancave dhe ekzekutime të punonjësve të shpëtimit, ngjarje që, siç tha ai, vërtetohen nga dëshmitë dhe materialet vizive.
Të shtunën e kaluar, autoritetet palestineze publikuan një video që, sipas tyre, dokumenton ekzekutimin e 15 ndihmësve në Rafah nga ushtarët izraelitë. Trupat e tyre u gjetën në një varr masiv dhe materiali u gjet në celularin e një prej viktimave.
Presidenti turk tha se ndërsa Izraeli vazhdon të “shkelë hapur dinjitetin njerëzor” në Gaza, Ankaraja do të qëndrojë e vendosur në krah të palestinezëve, duke premtuar se “nuk do t’ua kthejë kurrë shpinën atyre”. /tesheshi.com/
