Një show publik po zhvillohet prej mëngjesit në Komisionin e Sigurisë Kombëtare ku në transmetim live kreu i shërbimit sekret, Visho Ajazi-Lika, Drejtori i Policisë së Shtetit, Haki Çako dhe Ministri i Brendshëm, Saimir Tahiri, po raportojnë për një pajisje përgjimi.
Opozita dhe LSI po sulmojnë ashpër Ministrinë e Brendshme duke e akuzuar dhe bërë sa më shumë zhurmë në këtë aspekt.
Për këtë çështje ka nisur një hetim publik nga Prokuroria e Përgjithshme, madje vetë Kryeprokurori Llalla u shpreh se nuk mund të shkojë në komision se hetimi është në vazhdim.
Kur ka një hetim për këtë çështje është normale që gjithçka t’i lihet hetimit dhe më pas kur ai të përfundojë, të bëhen analizat përkatëse.
Por atëherë pse bëhet zhurmë nga politika këto ditë?!
Duket se gjithçka lidhet me një ngjarje të bujshme që po zhvillohet në jug të vendit prej më shumë se një jave.
Bëhet fjalë pikërisht për çështjen “Balili”, kur një ditë më parë është finalizuar ajo çka pritej: urdhër arresti për të ashtuquajturi “Escobari i Ballkanit”.
Që duket se e gjitha kjo zhurmë ka lidhje me këtë çështje, këtë e thotë qartë dhe një analizë e Artur Zhejit, një opinionist shumë i afërt i kreut të LSI-së Ilir Meta, në një media online që duket se ka qasje pro LSI-së.
“Ndërsa Luan Rama, deklaroi se në betejën e ardhshme elektorale në Peshkopi, nuk ishte i sigurtë nëse PS dhe LSI, do të kishin një kandidat të përbashkët.
Ndërkohë që përflitet, se të ashtuquajturit CNN grek, lajmet mbi “Balli gate”, ishin servirur nga Policia Shqiptare. Prandaj edhe ata, CNN grek, ranë në konfuzion, në lidhje me burimin e lajmit, 48 orë më vonë. Apo duhej të ndodhtë kjo rastësi, pikërisht gjatë vizitës, së bollshme me takime të rëndësishme, të Ilir Metës në USA.
Ku edhe prania e Anastas Angjelit, deputet i PS, mik i vjetër i Metës, dukshëm i pakënaqur nga trajtimi i Ramës, ishte domethënëse.
Mirëpo, përflitet gjithashtu, që përgjimi i Shukri Xhelilit dhe videot e famshme me 20 vjecaren, u nxorën në media sipas strategjisë: “Sy për sy dhe dhëmb për dhëmb!”, pasiqë kishin disa ditë që përpunoheshin dhe rrinin në arkiv.
Në pritje…”,shkruan Zheji në portalin 360.net.
Ndërsa një javë më parë si “pritë” publike për çështjen “Escobar” doli Shukja i Peshkopisë dhe e la në hije për disa ditë çështjen, sot ka dalë pajisja përgjuese.
Por, duket se palët po luajnë fort.
Vetë mos arrestimi apo procedimi i policisë me slow motions ka ngritur nervat e palëve që prisnin ta zgjidhin këtë çështje pa bujë.
Shukri Xhelili, edhe pse u shkarkua tashmë u harrua. Ka nisur një “skandal” tjetër në shërbim të politikës së ditës. Çudia në këtë vend 3 ditë zgjat…/tesheshi.com/
