Lëvizja Socialiste për Integrim pasi u sulmua politikisht nga dy partitë e mëdha në këtë fushatë, po bën ç’është e mundur që të shfaqet edhe “fizikisht” si viktimë e këtyre zgjedhjeve.
Çdo ditë kemi nga një denoncim publik për dhunim të anëtarëver të LSI-së dhe akuza politike i drejtohet aleatit të deridjeshëm PS-së.
Të paktën tre raste, në Fier, Lezhë dhe Pukë, janë shfaqur deri më tani në media si “mobilizim i shtetit kundër LSI-së”, por në asnjërin prej këtyre incidenteve nuk kemi faktikisht një version zyrtar të policisë mbi arsyet e dhunës dhe autorët e dhunës.
Pra, zhurma është për ekranet e televizioneve dhe për efekt fushate.
Zgjedhjet në Shqipëri janë shoqëruar gjithmonë me incidente dhune deri në raste ekstreme të vrasjeve para kutive të votimit.
Por duket se këto zgjedhje ishin shumë të qeta për të qenë “shqiptare” dhe prej një jave dëgjojmë fjalën dhunë. Të tre rastet e incidenteve kanë qenë fatmirësisht të lehta, pasi personat e dëmtuar, kanë pasur gërvishtje ose dëmtime të lehta.
I dëmtuari i Lezhës, Gjovalin Gjini, pasi u vizitua në krevatin e spitalit nga kandidati për deputet Viktor Tushaj ku në 
kamera i dukej gjuri i fashuar, doli në krah të Ilir Metës duke ecur dhe ndryshe nga momenti i spitalit kishte dy krahët e fashuar.
Një video ku shihet kandidati Tushaj duke futur një zarf në xhepin e simpatizantit të LSI-së po kthehet virale në rrjet, pasi njerëzit besojnë se ai mund t’i ketë dhënë një zarf me para si “shpërblim”
Shiko videon:
Tusha e ka ndjekur Gjinin teksa po zbrisnin nga shkallët dhe në një mënyrë diskrete ( ashtu siç bëjmë nëpër spitale kur i fusim bakshishin infermierës apo mjekut) i ka futur një zarf në xhep. Nuk dihet se ç’përmbante ky zarf që iu dorëzua edhe në prezencë të Metës, por fytyra e simpatizantit të dëmtuar duket pak e habitur, megjithëse ai nuk kundërshton.
Personi në fjalë ka thënë në polici se u dhunua nga disa persona me maska dhe se nuk e dinte kush ishin ata, por Ilir Meta ka shkuar një ha0p më tutje duke deklaruar se “do ta armatos unë popullin nëse policia nuk i lidh këta zagarë”.
Nga ana e saj PS ka hedhur poshtë çdo lidhje me këtë rast. “Lidhja e dhunimit me Partinë Socialiste është ose lajthitje ose përpjekje për t’u kacavjerrë pas një konflikti për të përfituar politikisht. Nëse kanë fakte t’i denoncojnë”- tha kandidati i PS-së, Pjerin Ndreu.
Në të gjitha rastet krerët e LSI-së kanë nxituar ta quajnë një skenar dhune të parapregatitur duke sulmuar policinë e shtetit dhe drejtorin e përgjithshëm të policisë Haki Çako.
Por a ka vend për një reagim të tillë?!
Këto raste dhune duken krejt sporadike dhe të pavërtetuara për lidhjen politike.
Vetëm 4 vite më parë, në zgjedhjet e vitit 2013, një njeri u vra ditën e votimit opranë një KZAZ-je në Laç. Simpatizanti i LSI-së Gjon Gjoni mbeti i vdekur pas një konflikti me armë ku u përfshinë disa veta, ndër ta dhe kandidati për deputet i PD-së, Mhill Fufi dhe kushëriri i tij, të cilët mbetën të plagosur.
Në atë kohë Meta tha se e kishte paralajmëruar policinë për këtë që ndodhi, pasi situata ka qenë e tensionuar shumë ditë para zgjedhjeve.
Duket se incidentet e dhunshme në fushatat elektorale vijojnë të jenë pjesë e sjelljes së militantit politik, shpesh edhe të nxitur nga gjuha politike e liderëve partiake.
Në këto raste detyra e politikanëve është qetësimi i gjakrave, thirrja për qetësi dhe jo nxitja e mëtejshme e dhunës.
Por vrapimi i Metës, sot i zgjedhur si presidenti i vendit, për të marrë megafonin dhe të krijojë idenë sikur po jetojmë në vitin 1997, duket krejt i pavënd dhe kthehet në një megafon të dhunës vetëm një javë para zgjedhjeve./tesheshi.com/
