Belgjika e para disa ditëve, që humbi ndaj Italisë e u shfaq e përgjumur dhe e pafuqishme, është shndërruar tërësisht në këtë mesditë të nxehtë të së shtunës.
Në Bordo, në stadiumin “Matmut-Atlantique”, Belgjika ka fituar thellë, 3-0, ndaj Irlandës, duke marrë dhe tre pikët e para në grup.
Ky rezultat përsëritet në dy ndeshje të njëpasnjëshme të Euro 2016-tës, dhe u ka buzëqeshur dy skuadrave, Spanjës e Belgjikës, që kanë bërë ligjin në fushë.
Belgët e kishin sot detyrim fitoren, ndryshe, në kundërshtim me parashikimet, do duhej të bëheshin gati për t’u kthyer në shtëpi. Pa asnjë pikë në grupin E, ishte pikërisht momenti për të shpërthyer.
Dhe Belgjika nuk ka zhgënjyer. Tre golat kanë ardhur në pjesën e dytë, kur edhe presioni ka qenë më i madh ndaj irlandezëve. Dy gola janë shënuar nga Lukaku, e një nga Witsel.
Irlanda nuk ka patur forcë për t’iu kundërvënë kundërshtarit, duke e pranuar në njëfarë mënyre rezultatin. Momentet e saj më të mira qenë pas golit të parë të belgëve, por ndëshkimi me golin e dytë do t’i shkurajonte.
Irlandezëve u duhet të fitojnë ndaj Italisë që të mund të shpresojnë për të kaluar grupin, e belgëve u mjafton një barazim ndaj suedezëve për t’u kualifikuar. /tesheshi.com/
