Procesi i zgjerimit të Bashkimit Evropian duhet të përshpejtohet, tha presidentja e Komisionit Evropian von der Leyen të mërkurën në Strasburg.
“E ardhmja e Ukrainës është në Unionin tonë. E ardhmja e Ballkanit Perëndimor është në Unionin tonë. E ardhmja e Moldavisë është në Unionin tonë. Dhe unë e di se sa e rëndësishme është perspektiva evropiane për shumë njerëz në Gjeorgji”, tha ajo në seancën plenare të Parlamentit Evropian në Strasburg.
Ajo tha se blloku prej 27 vendeve ka nevojë për reforma dhe mbështet rishikimin e Traktatit të Bashkimit “nëse dhe ku është e nevojshme” dhe tha se nuk duhet pritur që kjo të ndodhë për të përshpejtuar integrimin evropian.
“Një Union i gatshëm për zgjerim mund të arrihet më shpejt”, dhe parakusht për këtë është t’u përgjigjemi pyetjeve praktike se si do të funksionojë në praktikë BE-ja me më shumë se 30 vende, theksoi Von der Leyen.
Serbia dhe Mali i Zi po zhvillojnë negociatat, por ngadalë, Maqedonia e Veriut dhe Shqipëria i hapën ato zyrtarisht vetëm në vitin 2022, Ukraina, Moldavia dhe Bosnja morën statusin e kandidatit vitin e kaluar dhe Kosova ka statusin e kandidatit potencial.
Një mesazh për të rinjtë para zgjedhjeve evropiane
Politikanja gjermane, mandati i së cilës në krye të KE-së në gjysmën e parë të mandatit u shënua nga pandemia e koronavirusit dhe më pas lufta në Ukrainë, mbajti fjalimin e saj të fundit për gjendjen e Unionit para zgjedhjeve evropiane.
Von der Leyen iu drejtua votuesve, veçanërisht të rinjve që do të votojnë për herë të parë në zgjedhjet evropiane të vitit 2024.
“Për më pak se 300 ditë, evropianët do të shkojnë në zgjedhje në demokracinë tonë unike dhe të jashtëzakonshme. Si me çdo zgjedhje tjetër, do të jetë koha që njerëzit të reflektojnë mbi gjendjen e Unionit tonë dhe punën që po bëhet nga ata që i përfaqësojnë. Kjo do të jetë koha për të vendosur se çfarë lloj të ardhmeje dhe çfarë lloj Europe duan ata”, tha ajo.
Fjalimi i parë për gjendjen e BE-së u mbajt nga Jose Manuel Barroso në vitin 2013, traditën e vazhdoi Jean-Claude Juncker dhe më pas Von der Leyen. /tesheshi.com/
