Një ndër këshilltarët bashkiakë të Kavajës, Sulejman Rustemi i PDIU-së, i ka tërhequr një vërejtje miqësore deputetit socialist të zonës, Parid Cara; e njëherësh ka shprehur shqetësimin e tij në lidhje me ngërçin politik që tashmë po precipiton dhe në Kavajë, ku dhe pak javë dhe elektorati i atyshëm do shkojë në zgjedhje të parakohshme lokale, pas heqjes së mandatit të kryebashkiakut Roshi.
Në një status të tij në FB, Rustemi jep disa propozime, ku së paku Kavaja të funksionojë dhe të mos mbetet peng i politikës së madhe deri në zgjedhjen e pasardhësit të Roshit.
Shkruan Rustemi:
KAVAJA NE UDHËKRYQ
Para disa ditësh deputeti i Partisë Socialiste z. Parid Cara hodhi idenë që për shkak të mungesës së opozitës në Kavajë duhet të dalë një ose me shumë kandidatë në zgjedhjet e parakohshme që pritet të mbahen në këtë qytet me pretendimim se banorëve të zonës u duhet dhe e meritojnë më shumë se një kandidaturë. Shumë i drejtë pretendimi i z. Cara, por, nëse ky propozim do të vinte nga vetë ai si një përfaqësues i shoqërisë civile apo i një partie tjetër jashtë koalicionit tonë do të ishte edhe më shumë i drejtë. Madje po të dilte vetë ai përballë kandidatit të mazhorancës do të ishte më e drejtë pasi për katër vite ai “ka folur” aq shumë për Kavajën në foltoren e parlamentit saqë votuesit e Bashkisë Kavajë do t’a mbështesnin me shumë siguri.
Ndërkohë Lulzim Basha thotë që do ta prishë procesin ditën e votimit siç parandaloi hyrjen e Fatmir Xhafës nga dera kryesore e ministrisë. Kanë mbetur edhe dy ditë që zyrtarisht të fillojë fushata për zgjedhjet e pjesshme në Kavajë. Dilema që del qartë nga kjo situatë është se a do të mbahen zgjedhjet apo jo?! Do të ketë zgjidhje apo zgjedhje? Kjo është dilema më e madhe që buron nga një qorrsokak që duket se nuk ka fund në horizont.
“Gozhda” e dekriminalizimit duhet të funksiononte ndryshe, duke vendosur kritere paraprake. Jo pasi janë bërë gjërat faktike, të ngrihet populli e të bëhet gjithë kjo gjurulldi e si përfundim cënohet procesi i zhvillimit të mëtejshëm të aktivitetit të pushtetit vendor. Mendoj që në raste të ngjashme duhet t’i jepet më shumë kompetencë Këshillit Bashkiak që të udhëheqë institucionin deri në përfundim të mandatit në të gjitha situatat që i parashikon ligji kur bashkia mbetet pa drejtues. Prej një viti në mbledhjet e Këshillit Bashkiak kemi miratuar vetëm ndihmën ekonomike dhe ca gjera të vogla në të mirën e përgjithshme të Bashkisë Kavajë. Sot është thirrur një mbledhje jashtë radhe për Këshillin Bashkiak me qëllim që të përzgjidhet për të drejtuar bashkinë deri në zgjedhjen e kryetarit të ri njëri prej dy nënkryetarëve të emëruar më herët.
Por prapë po kthehem aty ku e nisa: Partia Demokratike thotë që nuk hyn në zgjedhje, Partia Socialiste nuk e ka vendosur ende emrin e kandidatit, LSI ka depozituar emrin e anëtarit të KZAZ, mirëpo thotë se nuk e mbështet kandidaturën e PS. PDIU natyrisht ende nuk ka shpërndarë orientim lokal se çfarë qëndrimi do të mbajë në Kavajë, nga shoqëria civile përfliten nën zë disa emra të njohur në qytet por asgjë serioze. Në fund të fundit, me apo pa zgjedhje ose zgjidhje, Kavajës i duhet një Kryetar Bashkie. /tesheshi.com/
