Ndërsa orët po kalojnë dhe gjithçka po i afrohet ditës finale të zgjedhjeve, liderët politikë në Britani po bëjnë apelet e fundit për votuesit, përpara se të shkohet në kutitë e votimit në në një proces të parakohshëm të së enjtes.
Kryeministrja konservatore Theresa May dhe kryetari i Laburistëve, Jeremy Corbyn kanë shpalosur programet e tyre me në fokus punësimin dhe mirëqenien.
Siguria ishte një tjetër pikë që ka dominuar fushatën, veçanërisht pas sulmeve në Mancester dhe Londër. May premtoi të ndryshojë ligjet për të drejtat e njeriut, nëse ato pengojnë përpjekjet kundër të dyshuarve si terroristë. Kështu procedurat për dëbimin e tyre do të lehtësohen. Nga ana tjetër, Corbyn është shprehur se May duhet të ndëshkohet pasi shpërfilli paralajmërimet për të mos bërë shkurtime në radhët e policisë.
May është ndalur edhe tek Brexit, për të cilin britanikët votuan rreth një vit më parë me referendum. Kryeministrja konservatore ka theksuar se paratë e shpenzuara më parë për projektet e BE-së do të sjellin më shumë përfitime, më shumë punë, shtëpi, rrugë e hekurudha më të mira.
Corbyn nga ana tjetër ka prezantuar politikat për rishtetëzimin e disa shërbimeve si ato hekurudhore e postare, heqjen e taksave për universitetet, më shumë shpenzime në shëndetësi dhe më shumë taksa për të pasurit.
Konservatoret janë në krye sipas sondazheve dhe një fitore e tyre në zgjedhjet e parakohshme do të lejonte May të niste bisedimet për Brexit në Bruksel duke pasur me vete mbështetjen e popullit. /tesheshi.com/
