Nga Mensur Krasniqi
OSBE/ODIHR-i në Shkup, ka paralajmëruar autoritetet qeveritare në Maqedoni se koha po kalon ndërsa ende nuk janë plotësuar parakushtet për zgjedhje demokratike, ashtu siç është marrë vesh në bazë të Marrëveshjes së Përzhinos ndërmjet katër liderëve të partive më të mëdha në vend.
“Janë të nevojshme ndryshime thelbësore që lidhen me sistemin zgjedhor për votim nga vendet e huaja, formati dhe kompetenca e KSHZ-së, raportimi i mediave, rregullat e financimit të fushatave zgjedhore, zgjidhja e parregullsive zgjedhore dhe garancitë për mbrojtje nga kryerja presion mbi votuesit dhe keqpërdorimi i mjeteve shtetërore. Kemi ardhur në përfundim se shkaku asaj se asnjë nga obligimet e Marrëveshjes së Përzhinos nuk ka përfunduar, nuk ka kohë për mbajtje të zgjedhjeve të lira dhe demokratike në afatin e paraparë”, potencon OSBE në një raport.
Pra, Zyra për institucione demokratike dhe të drejta të njeriut OSBE-ODIHR, tërheq vëmendjen se koha shkurt për përgatitje të zgjedhjeve do të reflektohet mbi aftësitë e pjesëmarrësve në zgjedhje për t’i kryer obligimet nga Marrëveshja e Përzhinos.
Nga ana tjetër, në opinion po qarkullojnë spekulime se BDI-ja dhe VMRO-ja do të shpërbëjnë qeverinë, vetëm e vetëm të shpëtojë kryeministri Nikolla Gruevski.
Ndryshe, në bazë të Marrëveshjes së Përzhinos, Gruevski obligohet që nga 15 janari i vitit të ardhshëm të lëshojë postin e kryeministrit deri sa të krijohet qeveria e re pas zgjedhjeve të parakohëshme parlamentare që pritet të mbahen më 24 prill.
Nëse ndodh kjo, atëherë automatikisht do të shfuqizohet Marrëveshja e Përzhinos, me çka BDI-ja e Ali Ahmetit do të dëshmojë Aleancën e përbetuar me VMRO-në e Nikollës. /tesheshi.com/
