Partia Socialiste më 27 gusht do të mbledh forumin e saj më të lartë, Asamblenë Kombëtare Socialiste ku do të bëhen të ditura disa vendime, mes të cilave edhe kabineti i ri qeveritar.
Në këtë mbledhje, që do të zhvillohet në “Hotel Tirana” do të publikohen edhe rezultatet që mori PS-ja në çdo kuti votimi në zgjedhjet e 25 qershorit, e njëkohësisht do të evidentohen fituesit dhe humbësit më të mëdhenj.
Po kështu do të bëhet një analizë e përgjithshme e zgjedhjeve dhe rezultatit të tyre në 25 qershor ku do të ndalet edhe te ata koordinatorë qarqesh që sollën rezultatin më të ulët për PS-në krahasuar me të tjerët.
Kreu i PS-së ka caktuar 5 grupe pune, të cilët kanë hartuar raporte specifike për mbledhjen e Asamblesë Kombëtare Socialiste dhe mbi bazën e këtyre raporteve pritet të vendoset edhe përbërja e qeverisë.
Gazeta “Shekulli” ka bërë një krahasim mes rezultateve që ka marrë Partia Socialiste në zgjedhjet e 2013 dhe atyre në vitin 2017. Nga krahasimi rezultojnë disa zona ku Partia Socialiste ka marrë më pak vota në 2017 krahasuar me vitin 2013.
Me bilanc negative rezultojnë disa nga ish-ministrat dhe ministrat. Kështu, ish-ministri i Shëndetësisë, Ilir Beqaj si drejtues i qarkut të Dibrës, Ditmir Bushati si drejtues i njësisë së Shkodrës, ish-zv.kryeministri Niko Peleshi, , ish-ministri i Financave Arben Ahmetaj, që shënoi rënie votash në bashkinë e Kavajës dhe po ashtu Taulant Balla, si drejtues politik i qarkut të Elbasanit, janë ndër emrat që në 2017 kanë siguruar më pak vota se 4 vjet më parë.
Rezultatet
Ish-ministri i Shëndetësisë, Ilir Beqaj ka shënuar rezultat negativ pasi Partia Socialiste në Qarkun e Dibrës në zgjedhjet e 2013 mori 25.103 vota, ndërsa në 25 qershor të këtij viti, 24.715.
Një emër tjetër me rezultat negativ është ish-ministri i Financave, Arben Ahmetaj që ka drejtuar fushatën e zgjedhjeve në njësinë bashkiake të Kavajës. Ahmetajt i numërohen jo një humbje por dy të tilla. Partia Socialiste në zgjedhjet e 25 qershorit në Kavajë mori më pak vota dhe njëkohësisht humbi dhe bashkinë.
Niko Peleshi në bashkinë Korçë ka marrë një rezultat negativ. Partia Socialiste në këtë qark në vitin 2013 mori 34.344 vota, ndërsa në vitin 2017 ka marrë 23.456 vota.
Taulant Balla ka shënuar një humbje të madhe në qarkun e Elbasanit, si drejtues politik i saj. Në rang qarku, PS ka minus 2705 vota, ose e thënë në përqindje, rënia është me 1.97.
Ministri i Jashtëm, Ditmir Bushati në Qarkun e Shkodrës ka humbur edhe në krahasim me rezultatin e 2013-ës. PS në 25 qershor në bashkinë Shkodër mori 20.195 vota, ndërsa në vitin 2013 ka marrë 26.984 vota. Diferenca është 6.789 vota. Humbës rezulton edhe deputeti Pandeli Majko, si drejtues i njësisë numër 5 në Tiranë.
Në këtë njësi PS-ja pësoi humbje me 1 për qind të votave. Njësia 7 e drejtuar nga Vasilika Hysi, ka shënuar po ashtu ulje me 51.61 % të votave, nga 51.82 % të tilla.
Rezultat pozitiv ka shënuar ish-ministri Fatmir Xhafaj. Ish-ministri përgjegjës për njësinë 10, një rritje të konsiderueshme plot 4.17 % krahasuar me vitin 2013. Rritje shënuan edhe ish-ministrja Olta Xhaçka dhe Ogerta Manastirliu. Ndërsa fituesit më të mëdhenj rezultojnë të jenë Gramoz Ruçi që pritet të marrë postin e kryetarit të Kuvendit, Damian Gjiknuri dhe Vangjush Dako.
Në rang vendi PS ka marrë 763.999 vota, 48.33 % të nr. të përgjigjëm të votave; e përkthyer në 74 mandate. Pritet të shikohet nëse Rama do të vendos për kabinetin e tij të ri në bazë të këtyre rezultateve, siç është shprehur. /tesheshi.com/
