Një fantazëm e re po shëtit në opinionin publik shqiptar. Dhe nuk është hyrja e Manifestit Komunist, por një tjetër flamë që zë përditë e më shumë vend në fjalorin e rrjeteve sociale që në fakt përbëjnë rrugën e përcjelljes së mesazhit politik. Dhe nuk është aspak një gjest periferik me agjitropë delirantë, kur shihet se dhe Ben Blushin e ka molepsur një gjuhë e tillë.
Po ç’po ndodh realisht?
Fjalorii të enjtes në parlament po implementohet përditë në postime e komente, ku argumenti ka humbur dhe fjalët më të shpeshta janë sharjet me libër shpie dhe kërcënimet për varje dhe vrasje.
Në statuset e mbështetësve të opozitës përshembull, njerëz publikë dhe të pozicionuar, përdoret një gjuhë e egër ndaj njerëzve të pushtetit, ku kryesisht në shënjestër është Erion Veliaj, njeriu më i zëshëm i mazhorancës.
“Do varur, s’ka rrugë tjetër”, “ta zhdukim”, etj., janë vetëm disa nga këto statuse që po yshten nga strategët e informacionit.
Marrëzia është bërë aq virale saqë portal i Kreshnik Spahiut shkran se shefi i tij, pra vetë Kreshniku i ngjan Hitlerit dhe do të vijë në pushtet si Fyhreri i tmerrshëm. Ju duket çudi? Jo, jo është e vërtetë, madje ka edhe një foto montazh krahasues.
Ndërkaq, Kastriot Islami, profesori i Fizikës që fliste dikur për kafka të thyera, sot flet për “rezistencë të tmerrshme”.
Flamur Noka, gjithashtu shkruan se do të ketë reagim të fuqishëm ndaj qeverisë.
Ndërkaq, ish-kryeministri Sali Berisha nxjerr një fotomontazh ku Koço Kokëdhimën e vendos në trupin e Mehmet Shehut në shtratin e (vetë)vrasjes.
Kurse Lulzim Basha vazhdimisht përdor një fjalor të nervozuar, duke kopjuar pikë për pikë opozitën e Edi Ramës të cilit para 2013-s nuk i qeshi buza asnjëherë.
Dhe kemi edhe 6 muaj përpara…Vërtetë s’kemi parë gjë akoma! /tesheshi.com/
