Zgjedhja e pasardhësit të liderit të talibanëve Mullahn Omar ka përçarë grupin, pasi një pjesë e figurave të larta thonë se në përzgjedhje nuk është konsultuar Këshilli i Lartë.
Burime talibane thanë për BBC-në se zëvendësi i Omar, Mullah Akhtar Mansour është zgjedhur në krye të grupit, të enjten, mirëpo një zëdhënës tha gjithashtu se emërimi i tij nuk është bërë nga të gjithë talibanët, gjë që shkon kundër ligjit të sharias.
Sipas zëdhënësit, Këshilli do të mblidhet për të zgjedhur një lider të ri.
Figura të larta nga radhët e talibanëve kanë akuzuar qarqet pro pakistaneze për caktimin e Mansour në krye të grupit, pasi ai është i njohur për mbështetjen që u jep bisedimeve të paqes.
Të paktën një fraksion Taliban do të kishte preferuar që në vend të Mullah Omar të zgjidhej djali i tij.
Zëdhënësi taliban, Mullah Abdul Manan Niazi tha se ata që zgjodhën Mullah Mansour nuk kanë zbatuar rregullat. “Sipas parimeve dhe ligjit islamik, nuk një lider vdes, këshilli Shura mblidhet për të caktuar liderin e ri”, tha ai.
Mullah Omar e drejtoi lëvizjen talibane për rreth 20 vjet. Vdekja e tij u konfirmua nga grupi të enjten. Ata thanë se ai kishte ndërruar jetë nga një sëmundje dhe se nuk kishte lëvizur nga Afganistani që prej ndërhyrjes amerikane aty.
Bisedimet e paqes që pritej të zhvilloheshin mes qeverisë afgane dhe talibanëve janë shtyrë pa afat. /tesheshi.com/
