Parlamenti turk miratoi zgjatjen e gjendjes së jashtëzakonshme në vend me tre muaj të tjerë. Vendimin e bëri të ditur dhe zëvendëskryeministri Numan Kurtulmush, pas një mbledhjeje të kabinetit qeveritar.
Me miratimin e parlamentit, u tha Kurtulmush gazetarëve, gjendja e jashtëzakonshme do të zgjatet me 90 ditë nga 19 janari.
“Spastrimi i shtetit nga elementët e FETÖ-s nuk ka përfunduar ende. Ne kemi nevojë për zbatimin e gjendjes së jashtëzakonshme deri në fund të spastrimit të FETÖ-s dhe të të gjitha grupeve terroriste në shtet,” ishte shpjegimi i funksionarit të lartë turk.
Zgjatja e gjendjes së jashtëzakonshme vjen në një moment kritik për Turqinë, ndërsa ajo po përballet me akte terroriste të njëpasnjëshme.
Gjendja e jashtëzakonshme u vendos fillimisht pas përpjekjes së dështuar për grusht shteti më 15 korrik të vitit të shkuar, për t’u zgjatur fillimisht në mesin e tetorit. /tesheshi.com/
